سیدنا ابوہریرہ رضی اللہ عنہ بیان کرتے ہیں: کچھ خواتین نے عرض کی: یا رسول اللہ! جب آپ صلی اللہ علیہ وسلم مردوں کے ساتھ تشریف فرما ہوتے ہیں، تو ہم یہاں حاضر نہیں ہو سکتی ہیں۔ اگر آپ صلی اللہ علیہ وسلم ہمارے لیے کوئی وقت مقرر کریں جس میں ہم آپ صلی اللہ علیہ وسلم کے پاس حاضر ہو جایا کریں (تو یہ مناسب ہوگا)۔ نبی کریم صلی اللہ علیہ وسلم نے فرمایا: ”تم لوگ فلاں خاتون کے گھر میں جمع ہو جایا کرو۔“ وہ خواتین اس مخصوص وقت میں وہاں آئیں۔ نبی کریم صلی اللہ علیہ وسلم بھی وہاں تشریف لے آئے۔ نبی کریم صلی اللہ علیہ وسلم نے ان خواتین کے ساتھ جو بات چیت کی اس میں آپ صلی اللہ علیہ وسلم نے یہ بھی ارشاد فرمایا: ”جس بھی عورت کے تین بچے فوت ہو جائیں اور وہ ثواب کی امید رکھے تو وہ عورت جنت میں داخل ہوگی۔“ ایک خاتون نے عرض کی: یا رسول اللہ! اگر کسی کے دو (بچے فوت) ہوں؟ نبی کریم صلی اللہ علیہ وسلم نے فرمایا: ”(اگر دو ہوں) تو بھی یہی اجر و ثواب حاصل ہوگا۔“ [مسند الحميدي/حدیث: 1049]