امام مالک رحمہ اللہ سے روایت ہے کہ انہوں نے ابن شہاب زہری سے پوچھا کہ اس آیت کی کیا تفسیر ہے: « ﴿يَا أَيُّهَا الَّذِينَ آمَنُوا إِذَا نُودِيَ لِلصَّلَاةِ مِنْ يَوْمِ الْجُمُعَةِ فَاسْعَوْا إِلَى ذِكْرِ اللّٰهِ﴾ » تو ابن شہاب نے جواب دیا کہ سیدنا عمر بن خطاب رضی اللہ تعالیٰ عنہ اس آیت کو یوں پڑھتے تھے: «‏‏‏‏”إِذَا نُودِيَ لِلصَّلَاةِ مِنْ يَوْمِ الْجُمُعَةِ فَامْضُوا إِلَى ذِكْرِ اللّٰهِ.“» ‏‏‏‏ [موطا امام مالك رواية يحييٰ/حدیث: 236]

امام مالک رحمہ اللہ نے فرمایا: سعی سے مراد اللہ کی کتاب میں عمل اور فعل ہے۔ اللہ جل جلالہُ فرماتا ہے: « ﴿وإِذَا تَوَلَّى سَعَى فِي الْأَرْضِ﴾ » یعنی ”جب پیٹھ موڑ کر جاتا ہے تو کام کرتا ہے زمین میں فساد کا۔“ اور فرمایا اللہ جل جلالہُ نے: « ﴿وَأَمَّا مَنْ جَاءَكَ يَسْعَى وَهُوَ يَخْشَى﴾ » یعنی ”جو تیرے پاس آیا عمل کرتا ہوا اور دوڑتا ہوا پروردگار سے۔“ اور فرمایا اللہ جل جلالہُ نے: « ﴿ثُمَّ أَدْبَرَ يَسْعَى﴾ » ”پھر پیٹھ موڑا کام کرتا ہوا فساد کا۔“ اور فرمایا اللہ جل جلالہُ نے: « ﴿إِنَّ سَعْيَكُمْ لَشَتَّى﴾ » ”تمہارے کام اقسام کے ہیں۔“ [موطا امام مالك رواية يحييٰ/حدیث: 236B1]

امام مالک رحمہ اللہ نے فرمایا: تو اس سعی سے بھی مراد عمل اور فعل ہے، نہ پاؤں سے چلنا اور نہ دوڑنا اور نہ پویا چلنا۔ [موطا امام مالك رواية يحييٰ/حدیث: 236B2]

امام مالک رحمہ اللہ نے فرمایا: اگر امام ایسے گاؤں میں اُترا جہاں جمعہ واجب ہے اور امام مسافر ہے، اس نے خطبہ پڑھا اور جمعہ ادا کیا تو گاؤں والے بھی اس کے ساتھ جمعہ پڑھ لیں۔ [موطا امام مالك رواية يحييٰ/حدیث: 237Q1]

امام مالک رحمہ اللہ نے فرمایا: اگر امام نے ایسے گاؤں میں جمعہ پڑھا جہاں پر جمعہ واجب نہیں ہے، تو نہ امام کا جمعہ درست ہوگا نہ جن لوگوں نے اس کے ساتھ جمعہ پڑھا اُن کا نہ گاؤں والوں کا، بلکہ جو لوگ مقیم ہیں وہ اپنی چار رکعتیں پوری کریں۔ [موطا امام مالك رواية يحييٰ/حدیث: 237Q2]

امام مالک رحمہ اللہ نے فرمایا: مسافر پر جمعہ واجب نہیں ہے۔ [موطا امام مالك رواية يحييٰ/حدیث: 237Q3]