فوائد:
اس حدیث سے کئی مسائل مستنبط ہوتے ہیں:
➊ سمندر کا پانی طاہر و مطہر ہے۔
➋ تمام سمندری حیوانات جن کی زندگی کا مدار پانی پر ہے، حلال ہیں۔
◈ امام مالک، شافعی اور احمد رحمہم اللہ کا بھی موقف ہے کہ تمام سمندری مردار حلال ہیں، لیکن امام ابوحنیفہ رحمہ اللہ کے نزدیک مچھلی کے سوا تمام سمندری مردار حرام ہیں۔
مفتی سے جب کسی مسئلے کے بارے میں سوال کیا جائے اور مفتی سمجھے کہ سائل کو اس سوال کے ساتھ مسئلے کی مزید وضاحت کی حاجت ہے تو اسے اضافی مسئلے سے روشناس کرانا مستحب عمل ہے، کیونکہ سائل کے جواب میں آپ صلی اللہ علیہ وسلم کا یہ ارشاد کہ سمندر کا مردار حلال ہے، مزید فائدے کے طور پر تھا اور یہ اضافی معلومات شکاریوں کے لیے مفید تھیں اور سائل بھی شکاری تھا۔
نیز یہ چیز فتویٰ کے محاسن میں شامل ہے۔
◈ حافظ ابن ملقن رحمہ اللہ کہتے ہیں کہ یہ حدیث اصولِ طہارت کی اہم اصل ہے جو کئی احکام اور اہم قواعد پر مشتمل ہے۔ [عون المعبود: 95/1]
➌ میٹھے پانی کی موجودگی میں سمندر کے کڑوے پانی سے وضو کرنا جائز ہے کیونکہ سمندر کا پانی مطلق طاہر ہے اور کوئی ایسی قید موجود نہیں جس سے یہ ثابت ہو کہ میٹھے پانی کی عدم دستیابی کی صورت میں ہی سمندر کے پانی سے وضو کیا جائے۔