فوائد:
➊ فجر کی دو اقسام ہیں:
1 فجر کاذب: فجر صادق سے کچھ دیر قبل طلوع ہوتی ہے اور اس کے طلوع کی علامت یہ ہے کہ آسمان کی طرف بھیڑیے کی دم کی مثل روشنی اُٹھتی ہے۔ اس وقت روزہ دار کے لیے کھانا پینا حلال ہے اور یہ اباحتِ طعام کا وقت ہے۔
2 فجر صادق: یہ فجر کاذب کے کچھ دیر بعد نمودار ہوتی ہے اور اس کی علامت یہ ہے کہ اس وقت روشنی مشرق میں پورے افق پر چوڑائی کے رخ میں پھیلتی ہے۔ یہ سحری کے اختتام کا وقت ہے اور اس وقت روزہ دار پر کھانا پینا حرام ہو جاتا ہے۔
➋ صبح صادق کا وقت نماز فجر کی اذانِ ثانی کا وقت ہے اور اس وقت تک روزہ دار کو کھانے پینے کی رخصت ہے اور طلوعِ فجرِ صادق پر روزے کا آغاز اور سحری کا اختتام ہو جاتا ہے۔ لہذا اذانِ فجر پر یا طلوعِ فجر کے ساتھ ہی سحری کو سمیٹ لینا چاہیے۔