فوائد:
➊ یہ حدیث دلیل ہے کہ محرم کا سینگی لگوانا جائز ہے۔ سر اور جسم کے دیگر اعضاء پر سینگی لگانے کے جواز پر علما کا اجماع ہے۔ یہ عمل عذر کی صورت میں جائز ہے۔ پھر اگر دورانِ سینگی جسم کے بال کٹیں تو اس پر فدیہ ہے اور اگر بال زائل نہ ہوں تو کوئی فدیہ نہیں، اس مسئلے کی دلیل یہ آیتِ قرآنی ہے: ﴿فَمَنْ كَانَ مِنْكُمْ مَرِيضًا أَوْ بِهِ أَذًى مِنْ رَأْسِهِ فَفِدْيَةٌ﴾ ”سو تم میں سے جو شخص بیمار ہو یا اس کے سر میں تکلیف ہو تو فدیہ ہے۔“ [سورة البقرة: 196]
➋ نیز اس حدیث میں احتمال ہے کہ نبی صلی اللہ علیہ وسلم کا وسطِ سر میں پچھنے لگوانا عذر کی وجہ سے تھا کیونکہ سر میں پچھنے لگانے سے لامحالہ بال کاٹنا پڑتے ہیں۔
➌ البتہ اگر محرم بلا عذر سینگی لگوائے اور اس سے بال زائل ہوں تو یہ عمل حرام ہے کیونکہ بلا عذر بال زائل کرنا حرام ہے اور اگر سینگی ایسے عضو پر لگائیں جہاں بال ضائع نہ ہوں تو شافعیہ اور جمہور علما کے نزدیک یہ عمل جائز ہے۔ ◈ [شرح النووي: 8/123]