فوائد:
➊ جب کسی کی نماز فوت ہو جائے تو اس کی قضا واجب ہے۔
پھر اگر نماز کسی عذر کی وجہ سے فوت ہو جائے تو، راجح مذہب کے نزدیک، اس کی قضا فی الفور مستحب ہے۔
اور صحیح مذہب کے نزدیک اس میں تاخیر بہر حال جائز ہے۔
اور اگر بلا عذر نماز چھوٹ جائے تو، راجح مذہب کے نزدیک، اس کی قضا فی الفور واجب ہے۔
اور ایک قول کے مطابق اس صورت میں بھی فوری قضا واجب نہیں بلکہ اس میں تاخیر جائز ہے۔
پھر اگر کئی نمازوں کی قضا دینی ہو تو انہیں بالترتیب پڑھنا مستحب ہے۔
لیکن اگر ترتیب چھوڑ دی جائے تو شافعی اور ان کے موافقین کے نزدیک نماز درست ہوگی، خواہ تھوڑی نمازیں ہوں یا زیادہ۔ [شرح النووي: 180/5]
➋ جو جگہ یا کام نماز میں غفلت کا سبب ہو، اس جگہ وغیرہ کو چھوڑ کر دوسری جگہ نماز پڑھنی چاہیے، اس سے شیطانی اثر زائل ہو جاتا ہے۔
➌ اگر کسی ایک نماز میں سستی واقع ہو تو اسے معمول نہیں بنانا چاہیے۔
بلکہ اس غفلت کو دور کرتے ہوئے مستقبل میں نمازوں کے وقت کی پابندی کی جائے۔