احنف بن قیس رحمہ اللہ بیان کرتے ہیں کہ میں اس شخص (سیدنا علی رضی اللہ عنہ) کی مدد کرنے کو چلا، راستے میں مجھ کو سیدنا ابوبکرہ رضی اللہ عنہ ملے، انہوں نے پوچھا: کہاں جاتے ہو؟ میں نے کہا: اس شخص (سیدنا علی رضی اللہ عنہ) کی مدد کرنے کو جاتا ہوں، سیدنا ابوبکرہ رضی اللہ عنہ نے کہا: اپنے گھر کو لوٹ جاؤ، میں نے نبی کریم صلی اللہ علیہ وسلم سے سنا ہے، آپ صلی اللہ علیہ وسلم فرماتے تھے: ”جب دو مسلمان اپنی اپنی تلواریں لے کر بھڑ جائیں، تو قاتل اور مقتول دونوں دوزخی ہیں۔“ میں نے عرض کی: یا رسول اللہ! قاتل تو خیر (ضرور دوزخی ہونا چاہیے) مقتول کیوں؟ آپ صلی اللہ علیہ وسلم نے فرمایا: ”وہ بھی اپنے ساتھی کو مار ڈالنے کی حرص رکھتا تھا۔“ (موقع پاتا تو وہ اسے ضرور قتل کر دیتا اس لیے دل کے پختہ ارادے پر وہ دوزخی ہوا)۔ [اللؤلؤ والمرجان/كتاب الفتن وأشراط الساعة/حدیث: 1834]