سیدنا ابوہریرہ رضی اللہ عنہ نے بیان کیا کہ ایک صحابی نبی کریم صلی اللہ علیہ وسلم کی خدمت میں حاضر ہوئے اور عرض کیا کہ یا رسول اللہ! میرے یہاں تو کالا کلوٹا بچہ پیدا ہوا ہے، اس پر رسول اللہ صلی اللہ علیہ وسلم نے فرمایا: ”تمہارے پاس کچھ اونٹ بھی ہیں؟“ انہوں نے کہا کہ جی ہاں، رسول اللہ صلی اللہ علیہ وسلم نے دریافت فرمایا: ”ان کے رنگ کیسے ہیں؟“ انہوں نے کہا کہ سرخ رنگ کے ہیں، رسول اللہ صلی اللہ علیہ وسلم نے دریافت فرمایا: ”ان میں کوئی سیاہی مائل سفید اونٹ بھی ہے؟“ انہوں نے کہا کہ جی ہاں، رسول اللہ صلی اللہ علیہ وسلم نے اس پر فرمایا: ”پھر یہ کہاں سے آ گیا؟“ انہوں نے کہا کہ اپنی نسل کے کسی بہت پہلے کے اونٹ پر یہ پڑا ہو گا، رسول اللہ صلی اللہ علیہ وسلم نے فرمایا: ”اسی طرح تمہارا یہ لڑکا بھی اپنی نسل کے کسی دور کے رشتہ دار پر پڑا ہو گا۔“ [اللؤلؤ والمرجان/كتاب اللعان/حدیث: 957]