صفیہ نامی خاتون، ابوتجرات کی صاحبزادی کا یہ بیان نقل کرتی ہیں: میں آل ابوحصین کے گھر میں قریش کی کچھ خواتین کے ساتھ داخل ہوئی، میں نے نبی کریم صلی اللہ علیہ وسلم کو دیکھا کہ آپ صفا اور مروہ کے درمیان سعی کر رہے تھے، میں نے آپ صلی اللہ علیہ وسلم کو سعی کرتے ہوئے دیکھا، آپ کے تیز دوڑنے کی وجہ سے آپ صلی اللہ علیہ وسلم کا تہبند ادھر ادھر ہل رہا تھا، یہاں تک کہ میں یہ کہہ سکتی ہوں کہ میں نے آپ صلی اللہ علیہ وسلم کی دونوں پنڈلیوں کو دیکھ لیا، میں نے آپ صلی اللہ علیہ وسلم کو یہ ارشاد فرماتے ہوئے سنا: ”تم لوگ سعی کرو، کیونکہ اللہ تعالیٰ نے تم پر سعی کرنا لازم قرار دیا ہے۔“ [سنن الدارقطني/ كتاب الحج/حدیث: 2585]