سیدنا عمر بن خطاب رضی اللہ عنہ نے خطبہ دیتے ہوئے فرمایا: ”عورتوں کے مہر میں زیادتی نہ کرو، اگر مجھے کسی کے بارے میں معلوم ہوا کہ اس نے رسول اللہ صلی اللہ علیہ وسلم سے زیادہ مہر دیا یا لیا ہے تو میں اس کا زائد مال بیت المال میں رکھ دوں گا۔“ پھر ایک قریشی عورت نے کہا: ”اے امیر المؤمنین! اللہ عزوجل کی کتاب زیادہ حق رکھتی ہے یا آپ کا قول؟“ سیدنا عمر رضی اللہ عنہ نے فرمایا: ”اللہ عزوجل کی کتاب۔“ اس نے کہا: ”آپ نے لوگوں کو مہر میں زیادتی سے منع فرمایا حالانکہ اللہ عزوجل فرماتا ہے: «وَآتَيْتُمْ إِحْدَاهُنَّ قِنْطَارًا فَلَا تَأْخُذُوا مِنْهُ شَيْئًا» [النساء: 20] ۔“ تو سیدنا عمر رضی اللہ عنہ نے کہا: ”ہر شخص عمر سے زیادہ فقیہ ہے۔“ پھر منبر پر واپس آئے اور فرمایا: ”میں نے تمہیں عورتوں کے مہر میں زیادتی سے منع کیا تھا، تو اب ہر شخص اپنے مال میں جو چاہے کرے۔“ [سنن سعید بن منصور/كتاب النكاح/حدیث: 1775]