سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ایک شخص کے ہاتھ میں سونے کی بنی ہوئی انگوٹھی دیکھی تو اسے اتارا اور ایک طرف رکھ دیا، اور آپ صلی اللہ علیہ وسلم نے ارشاد فرمایا: ”تم میں سے کوئی شخص جہنم کے انگارے کا قصد کرتا ہے اور اسے اپنے ہاتھ میں رکھ لیتا ہے۔“ (راوی بیان کرتے ہیں) جب نبی اکرم صلی اللہ علیہ وسلم تشریف لے گئے، تو ان صاحب سے کہا گیا: تم اپنی انگوٹھی لو اور اس کے ذریعے نفع حاصل کرو (یعنی اسے فروخت کر کے اس کی قیمت استعمال کرو)، تو اس شخص نے کہا: جی نہیں، اللہ کی قسم! میں اسے کبھی نہیں لوں گا جبکہ نبی اکرم صلی اللہ علیہ وسلم نے اسے ایک طرف کر دیا ہے۔ [صحیح ابن حبان/المقدمة/حدیث: 15]