سیدنا عبداللہ بن عمرو رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”سیدنا سلیمان علیہ السلام نے اللہ تعالیٰ سے تین چیزیں مانگی تھیں، اللہ تعالیٰ نے دو چیزیں انہیں عطا کر دیں اور مجھے یہ امید ہے، اللہ تعالیٰ نے انہیں تیسری چیز بھی عطا کر دی ہو گی۔ انہوں نے اللہ تعالیٰ سے سوال کیا کہ ان کو ایسی بادشاہی ملے جو ان کے بعد کسی اور کو نہ ملے، تو اللہ تعالیٰ نے یہ چیز انہیں عطا کر دی۔ انہوں نے اللہ تعالیٰ سے سوال کیا کہ انہیں ایسا فیصلہ کرنے کی ایسی صلاحیت ملے جو اللہ تعالیٰ کے فیصلے کے مطابق ہو، تو اللہ تعالیٰ نے انہیں یہ چیز بھی عطا کر دی۔ انہوں نے اللہ تعالیٰ سے یہ دعا مانگی کہ جو شخص اس گھر (نبی اکرم صلی اللہ علیہ وسلم کی مراد بیت المقدس تھی) کی زیارت کے لیے آئے اور اس کا مقصد صرف وہاں نماز ادا کرنا ہو، تو وہ اپنے گناہوں سے یوں باہر آ جائے جس طرح اس دن تھا جب اس کی والدہ نے اسے جنم دیا تھا۔“ نبی اکرم صلی اللہ علیہ وسلم یہ ارشاد فرماتے ہیں: ”مجھے امید ہے، اللہ تعالیٰ نے انہیں یہ تیسری چیز بھی عطا کر دی ہو گی۔“ [صحیح ابن حبان/كتاب الصلاة/حدیث: 1633]