ہلال بن یساف بیان کرتے ہیں: زیاد بن ابو جعد نے میرا ہاتھ پکڑا، ہم اس وقت ”رقہ“ میں موجود تھے۔ انہوں نے مجھے بنو اسد سے تعلق رکھنے والے ایک عمر رسیدہ شخص کے پاس لا کر کھڑا کیا، ان کا نام سیدنا وابصہ بن معبد رضی اللہ عنہ تھا۔ زیاد نے یہ بتایا، اس بزرگ نے مجھے یہ حدیث سنائی ہے: ایک شخص نے نبی اکرم صلی اللہ علیہ وسلم کے پیچھے اکیلے کھڑے ہو کر نماز ادا کی، وہ کسی دوسرے کے ساتھ (صف میں) کھڑا نہیں ہوا تھا تو نبی اکرم صلی اللہ علیہ وسلم نے اسے نماز دوبارہ ادا کرنے کا حکم دیا۔ (امام ابن حبان رحمہ اللہ فرماتے ہیں:) یہ روایت ہلال بن یساف نے عمرو بن راشد کے حوالے سے وابصہ بن معبد رضی اللہ عنہ سے سنی ہے اور انہوں نے یہ روایت زیاد کے حوالے سے سیدنا وابصہ رضی اللہ عنہ سے سنی ہے، تو اس کے دونوں طرق محفوظ ہیں۔ [صحیح ابن حبان/كتاب الصلاة/حدیث: 2200]