ابوبکر بن عبدالرحمن بیان کرتے ہیں کہ وہ سیدہ عائشہ رضی اللہ عنہا کی خدمت میں حاضر ہوئے اور یہ بتایا کہ سیدنا ابوہریرہ رضی اللہ عنہ ہمیں یہ فتوی دیتے ہیں کہ جو شخص صبح صادق کے وقت جنابت کی حالت میں ہو اس کا روزہ نہیں ہوتا، آپ اس بارے میں کیا کہتی ہیں؟ سیدہ عائشہ رضی اللہ عنہا نے بتایا کہ سیدنا بلال رضی اللہ عنہ نبی اکرم صلی اللہ علیہ وسلم کے پاس آپ صلی اللہ علیہ وسلم کو نماز کے لیے بلانے آتے تھے اور نبی اکرم صلی اللہ علیہ وسلم اس وقت جنابت کی حالت میں ہوتے تھے، پھر آپ صلی اللہ علیہ وسلم اٹھ کر غسل کرتے تھے اور میں آپ صلی اللہ علیہ وسلم کے دونوں کندھوں کے درمیان پانی کو بہتا ہوا دیکھ رہی ہوتی تھی، لیکن پھر بھی آپ صلی اللہ علیہ وسلم روزہ رکھ لیتے تھے۔ [صحیح ابن حبان/كتاب الصوم/حدیث: 3488]