سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے سیدنا ابوطیبہ رضی اللہ عنہ کو حکم دیا کہ وہ سورج غروب ہونے کے وقت نبی اکرم صلی اللہ علیہ وسلم کی خدمت میں حاضر ہوں، پھر آپ صلی اللہ علیہ وسلم نے انہیں یہ ہدایت کی کہ وہ افطاری کے وقت پچھنے لگانے کے اوزاروں کے ہمراہ نبی اکرم صلی اللہ علیہ وسلم کو پچھنے لگا دیں، پھر نبی اکرم صلی اللہ علیہ وسلم نے ان سے دریافت کیا: ”تمہارا خراج کتنا ہے؟“ انہوں نے جواب دیا: دو صاع۔ نبی اکرم صلی اللہ علیہ وسلم نے ان کا ایک صاع معاف کروا دیا۔ (امام ابن حبان رحمہ اللہ فرماتے ہیں:) سعید بن یحییٰ نامی راوی کو سعدان کے نام سے پہچانا جاتا ہے، یہ اہل دمشق سے تعلق رکھتے ہیں، یہ ثقہ اور مامون ہیں اور حدیث میں مستقیم الامر ہیں۔ [صحیح ابن حبان/كتاب الصوم/حدیث: 3536]