سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم اور سیدنا ابوبکر رضی اللہ عنہ شراب نوشی کی سزا میں کھجور کی شاخوں اور جوتوں سے پٹائی کرواتے تھے۔ جب سیدنا عمر بن خطاب رضی اللہ عنہ کا عہد خلافت آیا اور لوگ مختلف علاقوں اور بستیوں میں آباد ہو گئے تو سیدنا عمر رضی اللہ عنہ نے شراب نوشی کی سزا کے بارے میں لوگوں سے مشورہ کیا، تو سیدنا عبدالرحمن بن عوف رضی اللہ عنہ نے کہا: اے امیر المؤمنین! جب کوئی شخص شراب پیے گا تو وہ فحش باتیں کرے گا اور جب وہ فحش باتیں کرے گا تو وہ زنا کا جھوٹا الزام لگائے گا، اس لیے ہم یہ چاہتے ہیں کہ آپ اس کی سزا کو سب سے کم ترین حد کی مانند کر دیں۔ (راوی بیان کرتے ہیں) سب سے پہلے سیدنا عمر رضی اللہ عنہ نے شراب نوشی کی سزا میں اسی (80) کوڑے لگوائے۔ [صحیح ابن حبان/كتاب الحدود/حدیث: 4449]