سیدنا سلمہ بن اکوع رضی اللہ عنہ بیان کرتے ہیں کہ نبی اکرم صلی اللہ علیہ وسلم اسلم قبیلے سے تعلق رکھنے والے کچھ لوگوں کے پاس تشریف لائے جو بازار میں تیر اندازی کا مقابلہ کر رہے تھے۔ نبی اکرم صلی اللہ علیہ وسلم نے فرمایا: ”اے اسماعیل کی اولاد! تم تیر اندازی کرو کیونکہ تمہارے جد امجد بھی تیر انداز تھے اور میں بنو فلاں کے ساتھ ہوں۔“ نبی اکرم صلی اللہ علیہ وسلم نے کسی ایک فریق کے بارے میں یہ بات ارشاد فرمائی تو دوسرے فریق نے اپنے ہاتھ روک لیے۔ نبی اکرم صلی اللہ علیہ وسلم نے دریافت فرمایا: ”کیا ہوا ہے؟ تم لوگ تیر اندازی کرو۔“ ان لوگوں نے عرض کی: ہم کیسے تیر اندازی کر سکتے ہیں جبکہ آپ صلی اللہ علیہ وسلم بنو فلاں کے ساتھ ہیں؟ نبی اکرم صلی اللہ علیہ وسلم نے فرمایا: ”تم لوگ تیر اندازی کرو، میں تم سب کے ساتھ ہوں۔“ [صحیح ابن حبان/كتاب السير/حدیث: 4694]