سیدنا ابوشریح کعبی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص اللہ تعالیٰ اور آخرت کے دن پر ایمان رکھتا ہے اسے اپنے مہمان کی عزت افزائی کرنی چاہیے، جو شخص اللہ تعالیٰ اور آخرت کے دن پر ایمان رکھتا ہو اسے بھلائی کی بات کہنی چاہیے ورنہ خاموش رہنا چاہیے، جو شخص اللہ تعالیٰ اور آخرت کے دن پر ایمان رکھتا ہو اسے اپنے مہمان کی عزت افزائی کرنی چاہیے۔ اہتمام کے ساتھ اس کی دعوت ایک دن اور ایک رات ہوگی، عام مہمان نوازی تین دن ہوگی اور جو اس کے بعد ہو وہ صدقہ شمار ہوگا۔ البتہ مہمان کے لیے یہ بات جائز نہیں ہے کہ وہ اتنے دن وہاں قیام کرے کہ میزبان کو حرج میں مبتلا کر دے۔“ (امام ابن حبان رحمہ اللہ فرماتے ہیں:) سیدنا ابوشریح کعبی کا نام خویلد بن عمرو ہے، یہ جلیل القدر صحابہ کرام رضی اللہ عنہم میں سے ایک ہیں۔ ان کا شمار اہل حجاز میں ہوتا ہے، ان کا انتقال 86 ہجری میں ہوا۔ [صحیح ابن حبان/كتاب الأطعمة/حدیث: 5287]