نافع بیان کرتے ہیں کہ انہوں نے سیدنا کعب بن مالک رضی اللہ عنہ کے صاحبزادے کو سیدنا عبداللہ بن عمر رضی اللہ عنہما کو یہ بتاتے ہوئے سنا کہ ان کے والد (یعنی سیدنا کعب بن مالک رضی اللہ عنہ) نے انہیں بتایا کہ ان کی ایک کنیز تھی جو ”سلع“ پہاڑ کے پاس بکریاں چرا رہی تھی، اس نے اپنی بکریوں میں سے ایک بکری کو مرنے کے قریب دیکھا تو ایک پتھر توڑ کر اس کے ذریعے اسے ذبح کر لیا، پھر سیدنا کعب رضی اللہ عنہ نے اپنے گھر والوں سے کہا: ”تم اس کا گوشت اس وقت تک نہ کھاؤ جب تک میں نبی اکرم صلی اللہ علیہ وسلم کی خدمت میں حاضر ہو کر آپ صلی اللہ علیہ وسلم سے اس بارے میں دریافت نہ کر لوں۔“ چنانچہ میں نبی اکرم صلی اللہ علیہ وسلم کی خدمت میں حاضر ہوا اور میں نے نبی اکرم صلی اللہ علیہ وسلم سے اس بارے میں دریافت کیا، انہوں نے عرض کی: ”یا رسول اللہ صلی اللہ علیہ وسلم ! ہماری ایک کنیز ”سلع“ پہاڑ کے پاس بکریاں چرا رہی تھی، اس نے ان بکریوں میں سے ایک بکری کو قریبِ مرگ دیکھا تو پتھر توڑ کر اس کے ذریعے اسے ذبح کر لیا۔“ تو نبی اکرم صلی اللہ علیہ وسلم نے انہیں اس (بکری) کا گوشت کھانے کی اجازت دی۔ (امام ابن حبان رحمہ اللہ فرماتے ہیں:) یہ روایت نافع کے حوالے سے سیدنا عبداللہ بن عمر رضی اللہ عنہما سے منقول ہے اور نافع کے حوالے سے سیدنا کعب بن مالک رضی اللہ عنہ کے صاحبزادے کے حوالے سے ان کے والد سے بھی منقول ہے، تو اس کے تمام طرق محفوظ ہیں۔ [صحیح ابن حبان/كتاب الذبائح/حدیث: 5893]