سیدنا انس رضی اللہ عنہ بیان کرتے ہیں: نبی اکرم صلی اللہ علیہ وسلم چارپائی پر آرام فرما تھے وہ کھجور کی بٹی ہوئی رسی سے بنائی گئی تھی۔ راوی بیان کرتے ہیں: اسی دوران آپ کے اصحاب میں سے کچھ لوگ آپ کی خدمت میں حاضر ہوئے اور سیدنا عمر رضی اللہ عنہ بھی اندر آئے، نبی اکرم صلی اللہ علیہ وسلم نے جب پہلو بدلا تو اس بان کا نشان آپ کے پہلو پر موجود تھا۔ سیدنا عمر رضی اللہ عنہ رو پڑے، انہوں نے عرض کی: اللہ کی قسم! ہم یہ بات جانتے ہیں کہ آپ اللہ تعالیٰ کی بارگاہ میں کسریٰ اور قیصر سے زیادہ معزز ہیں، لیکن وہ دونوں عیش و عشرت کی زندگی گزار رہے ہیں۔ نبی اکرم صلی اللہ علیہ وسلم نے فرمایا: کیا تم اس بات سے راضی نہیں ہو کہ یہ چیزیں ان دونوں کے لئے دنیا میں ہوں اور ہمارے لئے آخرت میں ہوں۔ سیدنا عمر رضی اللہ عنہ نے کہا: جی ہاں۔ راوی کہتے ہیں: پھر وہ خاموش ہو گئے۔ [صحیح ابن حبان/كتاب التاريخ/حدیث: 6362]