سیدنا عبداللہ بن عمر رضی اللہ عنہما بیان کرتے ہیں: نبی اکرم صلی اللہ علیہ وسلم جب بھی کسی جنگ میں شریک ہونے کے لئے تشریف لے جاتے تھے، تو آپ سب سے آخر میں سیدہ فاطمہ رضی اللہ عنہا سے ملتے تھے اور جب بھی آپ کسی جنگ سے واپس تشریف لاتے تھے، تو سب سے پہلے سیدہ فاطمہ رضی اللہ عنہا سے ملتے تھے جب آپ غزوہ تبوک میں شرکت کے لئے تشریف لے گئے، تو آپ کے ساتھ سیدنا علی رضی اللہ عنہما بھی تھے۔ سیدہ فاطمہ رضی اللہ عنہا کھڑی ہوئیں۔ انہوں نے اپنے گھر میں ایک چٹائی بچھا لی اور گھر کے دروازے پر پردہ لٹکا دیا۔ انہوں نے اس پردے کو زعفران کے ساتھ رنگ دیا تھا جب ان کے والد تشریف لائے اور انہوں نے سیدہ فاطمہ رضی اللہ عنہا کے اس عمل کو دیکھا، تو وہ واپس تشریف لے گئے اور مسجد میں تشریف فرما ہوئے۔ سیدہ فاطمہ رضی اللہ عنہا نے سیدنا بلال رضی اللہ عنہ کو پیغام بھجوایا اور کہا: اے بلال! تم میرے والد کے پاس جاؤ اور ان سے دریافت کرو کہ آپ میرے دروازے سے واپس کیوں چلے گئے۔ سیدنا بلال رضی اللہ عنہ نبی اکرمک کی خدمت میں حاضر ہوئے آپ سے اس بارے میں دریافت کیا، تو نبی اکرم صلی اللہ علیہ وسلم نے ارشاد فرمایا: میں نے دیکھا ہے کہ اس نے وہاں ایک نیا کام کیا تھا۔ سیدنا بلال رضی اللہ عنہ نے سیدہ فاطمہ رضی اللہ عنہا کو اس بارے میں بتایا، تو انہوں نے اس پردے کو اتار دیا اور اس بچھونے کو اٹھا دیا اور اس پر موجود چیزوں کو ایک طرف رکھ کے خود پرانے سے کپڑے پہن لئے پھر سیدنا بلال رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے اور نبی اکرم صلی اللہ علیہ وسلم کو اس بارے میں بتایا، تو نبی اکرم صلی اللہ علیہ وسلم آپ کے ہاں تشریف لائے۔ آپ صلی اللہ علیہ وسلم نے انہیں (سیدہ فاطمہ رضی اللہ عنہا کو) انہوں نے گلے لگا لیا اور ارشاد فرمایا: ”تم اسی طرح رہا کرو، میرے ماں باپ تم پر قربان ہوں۔“ [صحیح ابن حبان/كتاب الرقائق/حدیث: 696]