سیدنا حذیفہ رضی اللہ عنہ بیان کرتے ہیں کہ میری والدہ نے مجھ سے کہا: ”نبی اکرم صلی اللہ علیہ وسلم سے تمہاری آخری ملاقات کب ہوئی تھی؟“ میں نے کہا: ”اتنے اتنے عرصے سے نبی اکرم صلی اللہ علیہ وسلم سے میری ملاقات نہیں ہوئی“، تو میری والدہ نے مجھے برا کہنا شروع کر دیا۔ میں نے کہا: ”میں نبی اکرم صلی اللہ علیہ وسلم کے پاس جاؤں گا، ان کے ساتھ نماز ادا کروں گا، وہ میرے لیے اور آپ کے لیے دعائے مغفرت کریں گے“، پھر میں نبی اکرم صلی اللہ علیہ وسلم کی خدمت میں حاضر ہوا اور مغرب کی نماز ادا کی، تو نبی اکرم صلی اللہ علیہ وسلم نے ان دونوں نمازوں کے ہمراہ نوافل ادا کیے، پھر آپ صلی اللہ علیہ وسلم روانہ ہوئے تو میں آپ صلی اللہ علیہ وسلم کے پیچھے آیا، آپ صلی اللہ علیہ وسلم نے مجھ سے دریافت فرمایا: ”کون ہے؟“ میں نے عرض کی: ”حذیفہ بن یمان (رضی اللہ عنہما)۔“ نبی اکرم صلی اللہ علیہ وسلم نے دریافت فرمایا: ”تم کیوں آئے ہو؟“ میں نے آپ صلی اللہ علیہ وسلم کو اس بارے میں بتایا جو میری والدہ نے مجھ سے کہا تھا، تو نبی اکرم صلی اللہ علیہ وسلم نے فرمایا: ”اللہ تعالیٰ تمہاری اور تمہاری والدہ کی مغفرت کرے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7126]