سیدنا انس بن مالک رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”میری امت کے بارے میں، میری امت میں سب سے زیادہ رحم دل ابوبکر رضی اللہ عنہ ہیں اور اللہ تعالیٰ کے معاملے میں سب سے زیادہ سخت عمر رضی اللہ عنہ ہیں اور حیا کے اعتبار سے سب سے زیادہ سچے عثمان رضی اللہ عنہ ہیں اور اللہ کی کتاب کے سب سے بڑے عالم ابی بن کعب رضی اللہ عنہ ہیں۔ علم وراثت کے سب سے بڑے عالم زید بن ثابت رضی اللہ عنہ ہیں۔ حلال اور حرام کے سب سے بڑے عالم معاذ بن جبل رضی اللہ عنہ ہیں، خبردار! ہر امت میں ایک امین ہوتا ہے اور اس امت کا امین ابوعبیدہ بن جراح رضی اللہ عنہ ہے۔“ (امام ابن حبان رحمہ اللہ فرماتے ہیں: اس حدیث میں جو الفاظ استعمال کیے گئے ہیں ان میں حرف ”من“ کو حذف کیا گیا ہے یعنی نبی اکرم صلی اللہ علیہ وسلم نے یہ فرمایا ہے «أَرْحَمُ أُمَّتِي» ”میری امت پر سب سے زیادہ رحم دل“ اس سے مراد یہ ہے «مِنْ أَرْحَمِ أُمَّتِي» ”میری امت کے رحم دل ترین لوگوں میں سے ایک“ اسی طرح نبی اکرم صلی اللہ علیہ وسلم کا یہ فرمان: «وَأَشَدُّهُمْ فِي أَمْرِ اللهِ يُرِيدُ مِنْ أَشَدِّهِمْ، وَمِنْ أَصْدَقِهِمْ حَيَاءً، وَمِنْ أَقْرَئِهِمْ لِكِتَابِ اللهِ، وَمِنْ أَفْرَضِهِمْ، وَمِنْ أَعْلَمِهِمْ بِالْحَلَالِ وَالْحَرَامِ» ”اور ان میں اللہ کے معاملے میں سب سے زیادہ سخت، اور ان میں سے سب سے زیادہ سچی حیا والے، اور ان میں سے اللہ کی کتاب کے سب سے بڑے قاری، اور ان میں سے سب سے زیادہ علمِ فرائض (وراثت) کے جاننے والے، اور ان میں سے حلال و حرام کے سب سے بڑے عالم“۔ نبی اکرم صلی اللہ علیہ وسلم کی مراد یہ ہے کہ یہ جماعت ایسی ہے جس میں یہ فضیلت پائی جاتی ہے، اس کی مثال نبی اکرم صلی اللہ علیہ وسلم کے اس فرمان کے مطابق ہو گی، جو آپ صلی اللہ علیہ وسلم نے انصار سے فرمایا تھا: ”تم لوگ میرے نزدیک تمام لوگوں سے زیادہ محبوب ہو“ اس کے ذریعے آپ صلی اللہ علیہ وسلم کی مراد یہ تھی کہ لوگوں میں سے میرے نزدیک محبوب ترین لوگوں میں سے ہو اور اس جماعت سے تعلق رکھتے ہو، جن سے میں محبت کرتا ہوں اور وہ لوگ اس میں شامل تھے۔) [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7131]