بشر بن عاصم اپنے باپ سے روایت کرتے ہیں کہ عمر رضی اللہ عنہ نے ابوسفیان بن عبد اللہ کو طائف اور اس کے اردگرد کے علاقوں میں عامل (زکوٰۃ لینے والا) مقرر کیا، وہ صدقہ (زکوٰۃ) لینے نکلے تو چھوٹے جانوروں (بچوں) کو بھی (بڑوں کے ساتھ) شمار کیا۔ جبکہ وہ چھوٹے بچے ان سے زکوٰۃ میں نہ لیتے تو انہوں نے کہا: ”اگر آپ ان چھوٹوں کو شمار کرتے ہیں تو ان کو زکوٰۃ کے طور پر ہم سے وصول بھی کریں۔“ وہ رک گئے (زکوٰۃ نہ لی) حتیٰ کہ عمر رضی اللہ عنہ کے پاس آئے اور ان سے کہا: ”آپ جان لیں کہ وہ لوگ یہ سمجھتے ہیں کہ آپ ان کے چھوٹے جانوروں کو شمار کرتے ہیں اور ان کی زکوٰۃ نہ لے کر آپ ان پر ظلم کرتے ہیں۔“ تو عمر رضی اللہ عنہ نے ان سے کہا: ”ان کے جانوروں کے چھوٹے بچے بھی شمار کرو حتیٰ کہ اس بچے کو بھی (جو اپنے پیروں پر چل نہیں سکتا) جسے گڈریا اپنے ہاتھ پر اٹھا کر لے جاتا ہے اور ان سے کہو، میں تم سے بچوں کو دودھ پلانے والی، نہ وضع حمل کے قریب، اور نہ دودھ والی، اور نہ ہی ذبح کے لیے موٹی کی ہوئی اور نہ ہی بکریوں سے جفتی کرنے والا بکرا لوں گا۔ اور ان سے عناق، جذعہ اور دو برس کا جانور لو اور یہ خراب اور عمدہ مال میں سے اوسط درجہ کا ہے۔“ [مسند امام شافعی/ كتاب الزكاة /حدیث: 698]