نافع اور عبداللہ بن دینار بیان کرتے ہیں کہ جب عبداللہ بن عمر رضی اللہ عنہما کوفہ تشریف لے گئے، اس وقت سعد بن ابی وقاص رضی اللہ عنہ وہاں کے گورنر تھے، انہوں نے دیکھا کہ سعد رضی اللہ عنہ موزوں پر مسح کرتے ہیں تو عبداللہ بن عمر رضی اللہ عنہما نے ان پر اعتراض کیا۔ سعد رضی اللہ عنہ نے فرمایا: ”اپنے باپ سے پوچھ لینا۔“ عبداللہ بن عمر رضی اللہ عنہما نے پوچھا تو عمر رضی اللہ عنہ نے فرمایا: ”جب تو پاؤں میں موزے وضو کی حالت میں پہنے تو ان پر مسح کر۔“ ابن عمر رضی اللہ عنہما نے پوچھا: ”اگر ہم بول و براز کے لیے جائیں تو؟“ عمر بن خطاب رضی اللہ عنہ نے فرمایا: ”اگرچہ بول و براز کے لیے جاؤ تو بھی (مسح کرو)۔“ [مسند الشافعی/ كتاب الطهارة /حدیث: 77]