422. حضرت انس ؓ فرماتے ہیں: میں نے نبی ﷺ کو مسجد میں موجود پایا جبکہ آپ کے ساتھ کچھ دیگر حضرات بھی تھے۔ (میں وہاں جا کر کھڑا ہو گیا تو آپنے مجھ سے فرمایا:) ”کیا تجھے ابوطلحہ نے بھیجا ہے؟“ میں نے عرض کیا: جی ہاں! پھر آپ نے فرمایا: ”دعوتِ طعام دینے کے لیے؟“ میں نے عرض کیا: جی ہاں! چنانچہ آپ ﷺ نے صحابہ کرام رضی اللہ عنھم سے فرمایا جو آپ کے پاس تھے: ”اٹھو، (چلیں)۔“ پھر آپ ﷺ وہاں سے روانہ ہوئے اور میں ان کے آگے آگے تھا۔ [صحيح بخاري، حديث نمبر:422]

حدیث حاشیہ:
اس عنوان کےدو اجزاء ہیں۔
ایک دعوت دینا دوسرا دعوت قبول کرنا کرنا یہ دونوں کام مسجد میں ہو سکتے ہیں۔
چنانچہ حضرت انس ؓ نے مسجد ہی میں آپ کو دعوت طعام پیش کی اور مدعو کا دعوت کو قبول کرنا بھی مسجد ہی میں ہوا ہے، دراصل امام بخاری ؒ ان ابواب میں یہ ثابت کرنا چاہتے ہیں کہ مسجد میں ہر قسم کی گفتگو پر پابندی نہیں ہے، کیونکہ جو گفتگو مسجد ہی سے متعلق ہو اس کے جائز ہونے میں تو کسی کو کلام نہیں ہے۔
اگر گفتگو مسجد سے متعلق نہیں تو بقدر ضرورت اس کا جواز ہے۔
جیسا کہ مسجد میں بیٹھے بیٹھے کسی شخص نے دعوت پیش کی اور وہیں اسے قبول کر لیا گیا تو اس کی اجازت ہے، کیونکہ یہ کلام جائز بقدر ضرورت ہے۔
(شرح تراجم بخاری)
نوٹ:
امام بخاری ؒ اس حدیث کو مکمل طور پر کتاب المناقب (الحدیث 3578)
میں بیان کریں گے لہٰذا اس سے متعلقہ دیگر مباحث بھی وہاں بیان ہوں گے۔
بإذن اللہ تعالیٰ۔