´سجدہ تلاوت میں آدمی کیا پڑھے؟`
ام المؤمنین عائشہ رضی الله عنہا کہتی ہیں کہ نبی اکرم صلی اللہ علیہ وسلم رات کے وقت سجدہ تلاوت میں پڑھتے تھے: «سجد وجهي للذي خلقه وشق سمعه وبصره بحوله وقوته» ”میرا چہرہ اس کے آگے سجدہ ریز ہوا جس نے اسے اپنی قدرت و قوت سے پیدا کیا، جس نے اسے سننے کے لیے کان اور دیکھنے کے لیے آنکھیں دیں۔‏‏‏‏“ [سنن ترمذي/كتاب الدعوات/حدیث: 3425]

اردو حاشہ:
وضاحت:
1؎:
میرا چہرہ اس کے آگے سجدہ ریز ہوا جس نے اسے اپنی قدرت وقوت سے پیدا کیا،
جس نے اسے سننے کے لیے کان اور دیکھنے کے لیے آنکھیں دیں۔

´سجدہ تلاوت میں کیا پڑھے؟`
ام المؤمنین عائشہ رضی اللہ عنہا کہتی ہیں کہ رسول اللہ صلی اللہ علیہ وسلم رات میں قرآن کے سجدوں میں کئی بار «سجد وجهي للذي خلقه وشق سمعه وبصره بحوله وقوته» یعنی ”میرے چہرے نے اس ذات کو سجدہ کیا جس نے اپنی قوت و طاقت سے اسے پیدا کیا اور اس کے کان اور آنکھ بنائے“ کہتے تھے۔ [سنن ابي داود/كتاب سجود القرآن /حدیث: 1414]

1414. اردو حاشیہ: یہ روایت سندا ضعیف ہے۔ تاہم شیخ البانی ؒ نے اسے صحیح قرار دیا ہے۔ لیکن ہمارے محقق ؒ فرماتے ہیں۔ کہ اس میں ایک راوی مجہول ہے۔ جسے امام ابو دائود نے عن رجل کہا ہے۔ اس لئے یہ روایت ضعیف ہے۔ جبکہ یہی دعا صحیح مسلم میں بھی ہے۔ لیکن وہاں اسے سجدہ نماز میں پڑھنے کا ذکر ہے۔ نہ کہ سجدہ قرآن میں (دیکھئے صحیح مسلم صلاۃ المسافرین حدیث 771) نیز امام نسائی ؒ بھی اس دعا کو اپنی سنن میں لائے ہیں۔ لیکن انہوں نے بھی اسے سجدے کی دُعائوں میں مختلف الفاظ سے ذکر کیا ہے۔ (دیکھئے سنن نسائی۔ الدعا فی السجود) البتہ امام دائود ؒ امام ترمذیؒ امام ابن خزیمہ ؒ اور امام ابن ماجہ ؒ نے اسے سجدہ تلاوت کے باب میں ذکر کیا ہے۔ ابودائود کی روایت کی سند ضعیف ہے۔ کیونکہ اس میں ایک راوی ہے۔ جسے امام ابو دائود ؒ نے عن رجل کہا ہے۔ اسی علت کی بنا پر امام ابن خزیمہ ؒ نے بھی اسے ضعیف کہا ہے۔ (دیکھئے صحیح ابن خزیمہ: 283/1، 284) سنن ترمذی کی روایت بھی ضعیف ہے۔ کیونکہ خالد الحذاء کا ابو العالیہ سے سماع ثابت نہیں۔ (دیکھئے سنن ترمذی الصلاۃ حدیث 580) اور سنن ابن ماجہ ؒ کی روایت صحیح تو ہے۔ لیکن وہ بھی مطلق سجدے کی دعا ہے۔ حدیث میں صراحت نہیں ہے۔ کہ اسے سجدہ تلاوت میں پڑھا جائے۔ لیکن امام ابن ماجہ ؒ نے اسے سجدہ تلاوت کی دعا کے باب میں درج کیا ہے۔ علاوہ ازیں یہ روایت بھی حضرت علی رضی اللہ عنہ سے مروی ہے۔ اور صحیح مسلم کی روایت مطلق سجدے والی بھی حضرت علی رضی اللہ عنہ سے مروی ہے۔ اس سے معلوم ہوتا ہے کہ یہ بھی مطلق سجدے کے بارے میں مروی ہے۔ (دیکھئے صحیح مسلم۔ صلاۃ المسافرین حدیث 771 اور سنن ابن ماجہ اقامۃ الصلوات حدیث 1054) سجدہ تلاوت کی صحیح دعا جو ابن عباس رضی اللہ عنہ سے مروی ہے۔ اسے امام ترمذی ؒ امام نووی ؒ اور حافظ ابن حجر ؒ نے حسن کہا ہے۔ (فتوحات ربانیہ 276/2) امام ابن خزیمہ ؒ ابن حبان ؒ حاکمؒ ذہبی ؒ اور شیخ احمد شاکرؒ نے صحیح قرار دیا ہے۔ اور شیخ البانی ؒ نے بھی حسن کہا ہے۔ یہ دعا ابتداء میں سجدہ تلاوت کے احکام ومسائل میں درج ہے۔ ان دلائل کی روشنی میں دوسری دعا پڑھنا ہی بہتر ہے۔ ھذا ما عندي واللہ أعلم بالصواب۔