1960. حضرت ربیع بنت معوذ ؓ سے روایت ہے انھوں نے فرمایا کہ نبی کریم ﷺ نے عاشورا ء کے دن صبح کو انصار کی بستیوں میں یہ پیغام بھیجا: ”جس نے آج روزہ نہ ر کھا ہو وہ بھی باقی دن کچھ نہ کھائے اور جس نے روزہ رکھا ہو وہ روزے سے رہے۔“ حضرت ربیع ؓ فرماتی ہیں کہ اس حکم کے بعد ہم عاشوراء کا روزہ رکھتیں اور اپنے بچوں کو بھی رکھواتیں نیز انھیں بہلانے کے لیے ہم روئی کے کھلونے بنا دیتیں۔ جب کوئی ان میں سے کھانے کے لیے روتا تو ہم اسے وہ کھلونا دے دیتیں یہاں تک کہ افطار کا وقت آجاتا۔ [صحيح بخاري، حديث نمبر:1960]

حدیث حاشیہ:
اس نشہ باز نے رمضان میں شراب پی رکھی تھی، حضرت عمر ؓ نے یہ معلوم کرکے فرمایا کہ ارے کم بخت! تو نے یہ کیا حرکت کی ہمارے تو بچے بھی روزہ دار ہیں۔
پھر آپ نے اس کو اسی کوڑے مارے اور شام کے ملک میں جلاوطن کر دیا۔
اس کو سعید بن منصور اور بغوی نے جعدیات میں نکالا ہے۔
اس واقعہ کو نقل کرنے سے حضرت امام بخاری ؒ کا مقصد صرف بچوں کو روزہ رکھنے کی مشروعیت بیان کرنا ہے۔
جس کا ذکر حضرت عمر ؓ نے فرمایا تھا پس مناسب ہے کہ بچوں کو بھی روزہ کی عادت ڈلوائی جائے۔
حافظ ابن حجر ؓ فرماتے ہیں و في الحدیث حجة علی مشروعیة تمرین الصبیان علی الصیام کما تقدم لأن من کان في مثل السن الذي ذکر في هذا الحدیث فهو غیر مکلف۔
یعنی اس حدیث میں دلیل ہے اس با ت پر کہ بطور مشق بچوں سے روزہ رکھوانا مشروع ہے، اگرچہ اس عمر میں وہ شرع کے مکلف نہیں ہیں۔

1960. حضرت ربیع بنت معوذ ؓ سے روایت ہے انھوں نے فرمایا کہ نبی کریم ﷺ نے عاشورا ء کے دن صبح کو انصار کی بستیوں میں یہ پیغام بھیجا: ”جس نے آج روزہ نہ ر کھا ہو وہ بھی باقی دن کچھ نہ کھائے اور جس نے روزہ رکھا ہو وہ روزے سے رہے۔“ حضرت ربیع ؓ فرماتی ہیں کہ اس حکم کے بعد ہم عاشوراء کا روزہ رکھتیں اور اپنے بچوں کو بھی رکھواتیں نیز انھیں بہلانے کے لیے ہم روئی کے کھلونے بنا دیتیں۔ جب کوئی ان میں سے کھانے کے لیے روتا تو ہم اسے وہ کھلونا دے دیتیں یہاں تک کہ افطار کا وقت آجاتا۔ [صحيح بخاري، حديث نمبر:1960]

حدیث حاشیہ:
(1)
اگرچہ بچے پر روزہ فرض نہیں ہے، تاہم اسے عادت ڈالنے کے لیے روزہ رکھنے کا حکم دیا جائے تاکہ عبادات اس کی گھٹی میں شامل ہو جائیں۔
بہتر یہ ہے کہ سات سال کے بچوں کو عبادات کی ترغیب دلائی جائے اور جب دس برس کے ہو جائیں تو سختی سے انہیں عبادات کا پابند کیا جائے۔
(2)
امام قرطبی نے کہا ہے:
بچوں کو کھلونے دے کر مصروف رکھنے کے عمل سے شاید رسول اللہ ﷺ آگاہ نہ ہوں کیونکہ انہیں بلاوجہ تکلیف میں مبتلا کرنا آپ کی شان رحیمی کے خلاف ہے۔
لیکن ان کی یہ بات محل نظر ہے کیونکہ صحیح مسلم میں حضرت ربیع بنت معوذ ؓ سے مروی حدیث میں ہے کہ ہم چھوٹے چھوٹے بچوں کو روزہ رکھواتیں اور انہیں اپنے ہمراہ مسجد میں لے جاتی تھیں۔
(صحیح مسلم، الصیام، حدیث: 2669(1136) (3)
حافظ ابن حجر ؒ لکھتے ہیں کہ اس حدیث میں دلیل ہے کہ مشق کے طور پر بچوں سے روزہ رکھوانا مشروع ہے اگرچہ وہ اس عمر میں شریعت کے مکلف نہیں ہیں۔
(فتح الباري: 257/4)