حضرت اسماء بنت ابی بکر رضی اللہ عنہا سے روایت ہے، وہ جب بھی مقامِ حجون سے گزرتیں تو فرماتیں: «صَلَّى اللَّهُ عَلَىٰ رَسُولِهِ مُحَمَّدٍ» ”اللہ تعالیٰ اپنے رسول محمد صلی اللہ علیہ وسلم پر اپنی رحمتیں نازل فرمائے!“ بے شک ہم آپ صلی اللہ علیہ وسلم کے ہمراہ اس مقام پر اترے تھے، ان دنوں ہم ہلکی پھلکی تھیں، ہماری سواریاں بھی کم اور زادِ راہ بھی تھوڑا تھا، میں، میری ہمشیرہ حضرت عائشہ رضی اللہ عنہا، حضرت زبیر رضی اللہ عنہ اور فلاں فلاں شخص ( صلی اللہ علیہ وسلم ) نے عمرہ کیا، ہم نے کعبہ کا طواف کر کے احرام کھول دیا، پھر ہم نے دوسرے وقت حج کا احرام باندھا۔ [صحيح البخاري/كتاب العمرة/حدیث: 1796]

حضرت عروہ بن زبیر رحمہ اللہ سے روایت ہے، انہوں نے کہا کہ مجھے اُم المومنین حضرت عائشہ رضی اللہ عنہا نے بیان کیا کہ نبی صلی اللہ علیہ وسلم جب مکہ مکرمہ آئے تو سب سے پہلے وضو کر کے بیت اللہ کا طواف کیا، صرف طواف کرنے ہی سے آپ صلی اللہ علیہ وسلم کا عمرہ مکمل نہیں ہوا تھا۔ پھر آپ صلی اللہ علیہ وسلم کے بعد حضرت ابوبکر رضی اللہ عنہ اور حضرت عمر رضی اللہ عنہ نے بھی ایسا ہی حج کیا۔ پھر میں نے اپنے والد محترم حضرت زبیر رضی اللہ عنہ کے ہمراہ حج کیا تو انہوں نے بھی سب سے پہلے طواف کیا۔ اس کے بعد میں نے مہاجرین و انصار کو دیکھا کہ وہ بھی اسی طرح کرتے تھے۔ میری والدہ (حضرت اسماء رضی اللہ عنہا) نے مجھے بتایا کہ انہوں نے اور ان کی ہمشیرہ حضرت عائشہ رضی اللہ عنہما نے، حضرت زبیر بن عوام رضی اللہ عنہ اور فلاں، فلاں نے عمرے کا احرام باندھا، انہوں نے جب حجر اسود کو ہاتھ لگایا (اور طواف مکمل کرنے کے بعد صفا و مروہ کی سعی کی) تو احرام کھول دیا۔ [صحيح البخاري/كتاب العمرة/حدیث: 1615]