حضرت عائشہ رضی اللہ عنہا سے روایت ہے، انہوں نے فرمایا کہ نبی کریم صلی اللہ علیہ وسلم روزے کی حالت میں کبھی بوسہ دیتے اور کبھی اپنا بدن میرے بدن سے لگا دیتے، مگر وہ اپنی خواہش پر تم سے زیادہ قابو یافتہ تھے۔ حضرت ابن عباس رضی اللہ عنہما فرماتے ہیں کہ «مَآرِبُ» [سورة طه: 18] سے مراد ”حاجت“ ہے، نیز طاؤس رحمہ اللہ کہتے ہیں کہ ﴿غَيْرِ أُولِي الْإِرْبَةِ﴾ [سورة النور: 31] سے مراد وہ لوگ ہیں جنہیں عورتوں کی خواہش نہیں ہوتی۔ جابر بن زید رحمہ اللہ کہتے ہیں کہ اگر وہ عورت کو دیکھے اور اسے انزال ہو جائے تو وہ روزہ پورا کرے گا۔ [صحيح البخاري/كتاب الصوم/حدیث: 1927]

حضرت عائشہ رضی اللہ عنہا سے روایت ہے، انہوں نے فرمایا کہ رسول اللہ صلی اللہ علیہ وسلم روزے کی حالت میں اپنی کسی بیوی کو بوسہ دیتے تھے۔ پھر وہ خود ہی ہنس پڑیں۔ [صحيح البخاري/كتاب الصوم/حدیث: 1928]