حضرت رافع بن خدیج رضی اللہ عنہ سے روایت ہے کہ میرے دونوں چچا (ظہیر اور مہیر رضی اللہ عنہم اجمعین) نبی کریم صلی اللہ علیہ وسلم کے عہد مبارک میں زمین اس پیداوار کے عوض کاشت پر دیتے تھے جو کھالوں کے آس پاس اگتی یا اسی چیز کے عوض جسے مالک زمین مستثنیٰ کر لیتا تھا۔ نبی کریم صلی اللہ علیہ وسلم نے اس سے منع فرما دیا۔ (راوی حدیث حضرت حنظلہ رحمہ اللہ کہتے ہیں:) میں نے حضرت رافع رضی اللہ عنہ سے دریافت کیا کہ درہم و دینار کے عوض زمین ٹھیکے پر دینا کیسا ہے؟ تو انہوں نے فرمایا: درہم و دینار کے عوض زمین ٹھیکے پر دینے میں کوئی قباحت نہیں۔ (ایک اور راوی حدیث) حضرت لیث رحمہ اللہ کہتے ہیں: جس بٹائی سے منع کیا گیا ہے وہ یہ ہے کہ اگر اس میں حلال و حرام سمجھنے والے غور و فکر کریں تو اس میں دھوکے کی وجہ سے اسے جائز قرار نہ دیں۔ [صحيح البخاري/كتاب المزارعة/حدیث: 2347]

حضرت رافع بن خدیج رضی اللہ عنہ سے روایت ہے انہوں نے کہا: میرے چچا ظہیر بن رافع رضی اللہ عنہ نے بیان کیا کہ رسول اللہ صلی اللہ علیہ وسلم نے ہمیں ایسے کام سے منع فرما دیا جو ہمارے لیے بہت نفع بخش تھا۔ میں نے کہا: رسول اللہ صلی اللہ علیہ وسلم نے جو فرمایا وہ حق ہے۔ حضرت ظہیر رضی اللہ عنہ نے کہا کہ رسول اللہ صلی اللہ علیہ وسلم نے مجھے بلا کر پوچھا: ”تم لوگ اپنے کھیتوں کا کیا کرتے ہو؟“ میں نے عرض کیا کہ ہم ان کو نالی کے کنارے کی پیداوار نیز کھجور اور جو کے چند وسق کے عوض کرائے پر دیتے ہیں۔ آپ صلی اللہ علیہ وسلم نے فرمایا: ”ایسا مت کرو۔ تم خود کاشت کرو یا کسی کو کاشت کے لیے دے دو یا اسے اپنے پاس ہی رہنے دو۔“ حضرت رافع رضی اللہ عنہ کہتے ہیں: میں نے کہا: جو ارشاد ہوا اسے ہم نے سنا اور دل سے مان لیا۔ [صحيح البخاري/كتاب المزارعة/حدیث: 2339]

حضرت رافع بن خدیج رضی اللہ عنہ سے روایت ہے، انہوں نے حضرت عبداللہ بن عمر رضی اللہ عنہما کو بتایا کہ ان کے دونوں چچا، جو جنگِ بدر میں شریک تھے، انہوں نے انہیں خبر دی ہے کہ ”رسول اللہ صلی اللہ علیہ وسلم نے زرعی زمینوں کو ٹھیکے پر دینے سے منع فرمایا ہے۔“ راویِ حدیث نے حضرت سالم رحمہ اللہ سے کہا: ”آپ تو زمین ٹھیکے پر دیتے ہیں؟“ انہوں نے کہا: ”ہاں، لیکن حضرت رافع بن خدیج رضی اللہ عنہ اپنے آپ پر سختی کرتے تھے۔“ [صحيح البخاري/كتاب المزارعة/حدیث: 4013]