حضرت انس رضی اللہ عنہ سے روایت ہے کہ انصار کے کچھ آدمیوں نے رسول اللہ صلی اللہ علیہ وسلم سے اجازت طلب کی، عرض کرنے لگے: آپ ہمیں اجازت دیں کہ ہم اپنے بھانجے عباس کا فدیہ چھوڑ دیں۔ آپ صلی اللہ علیہ وسلم نے فرمایا: ”ایک درہم بھی نہ چھوڑو۔“ [صحيح البخاري/كتاب العتق/حدیث: 2537]

حضرت انس بن مالک رضی اللہ عنہ سے روایت ہے کہ انصار کے کچھ لوگوں نے رسول اللہ صلی اللہ علیہ وسلم سے عرض کیا: اے اللہ کے رسول صلی اللہ علیہ وسلم ! آپ حکم دیں تو ہم اپنے بھانجے حضرت عباس رضی اللہ عنہ کے لیے ان کا فدیہ معاف کر دیں؟ آپ صلی اللہ علیہ وسلم نے فرمایا: ”نہیں، تم ان کے فدیے سے ایک درہم بھی نہ چھوڑو۔“ [صحيح البخاري/كتاب العتق/حدیث: 3048]

حضرت انس بن مالک رضی اللہ عنہ سے روایت ہے، انہوں نے فرمایا کہ نبی صلی اللہ علیہ وسلم کے پاس جب بحرین کا مال لایا گیا تو آپ کے پاس حضرت عباس رضی اللہ عنہ حاضر ہوئے اور عرض کیا: اللہ کے رسول صلی اللہ علیہ وسلم ! اس مال میں سے مجھے بھی دیجیے! کیونکہ میں نے اپنی جان کا فدیہ بھی دیا ہے اور عقیل کو بھی رہائی دلائی ہے۔ آپ صلی اللہ علیہ وسلم نے فرمایا: ”آپ (مال لے) لیں۔“ پھر ان کے کپڑے میں بھر کر انہیں مال عطا فرمایا۔ [صحيح البخاري/كتاب العتق/حدیث: 3049]

حضرت انس بن مالک رضی اللہ عنہ سے روایت ہے کہ انصار کے کچھ آدمیوں نے رسول اللہ صلی اللہ علیہ وسلم سے اجازت طلب کی اور کہا: ”آپ ہمیں اجازت دیں تو ہم اپنے بھانجے حضرت عباس رضی اللہ عنہ کا فدیہ معاف کر دیں؟“ آپ صلی اللہ علیہ وسلم نے فرمایا: ”اللہ کی قسم! ان کے فدیے سے ایک درہم بھی نہ چھوڑو۔“ [صحيح البخاري/كتاب العتق/حدیث: 4018]