حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم ایک مرتبہ میرے ہاں بہت ہی خوش خوش داخل ہوئے، خوشی اور مسرت سے آپ کی پیشانی کی شکنیں چمک رہی تھیں۔ آپ صلی اللہ علیہ وسلم نے فرمایا: ”(اے عائشہ رضی اللہ عنہا!) تم نے نہیں سنا کہ مجزز مدلجی نے زید اور اسامہ رضی اللہ عنہما کے بارے میں کیا کہا ہے؟ اس نے ان دونوں کے قدموں کو دیکھ کر کہا کہ یہ پاؤں تو ایک دوسرے سے ملتے جلتے ہیں، یعنی باپ بیٹے کے قدم ہیں۔“ [صحيح البخاري/كتاب المناقب/حدیث: 3555]

حضرت عائشہ رضی اللہ عنہا سے روایت ہے، انہوں نے فرمایا کہ ”ایک قیافہ شناس میرے پاس آیا جبکہ نبی صلی اللہ علیہ وسلم بھی میرے پاس موجود تھے۔ حضرت اسامہ رضی اللہ عنہ اور (ان کے والد گرامی) حضرت زید بن حارثہ رضی اللہ عنہ دونوں لیٹے ہوئے تھے تو اس قیافہ شناس نے کہا: ”یہ دونوں پاؤں باہم ایک دوسرے سے پیدا ہوئے ہیں۔“ حضرت عائشہ رضی اللہ عنہا کا بیان ہے کہ اس انکشاف سے نبی صلی اللہ علیہ وسلم بہت خوش ہوئے اور یہ بات آپ کو بہت پسند آئی۔ پھر آپ صلی اللہ علیہ وسلم نے حضرت عائشہ رضی اللہ عنہا سے اس کا اظہار کیا۔“ [صحيح البخاري/كتاب المناقب/حدیث: 3731]

سیدتنا عائشہ رضی اللہ عنہا سے روایت ہے، انہوں نے کہا کہ رسول اللہ صلی اللہ علیہ وسلم میرے ہاں ایک دفعہ بہت خوش خوش تشریف لائے، آپ صلی اللہ علیہ وسلم کے چہرے کے خطوط چمک رہے تھے۔ آپ صلی اللہ علیہ وسلم نے فرمایا: ”اے عائشہ! تم نے نہیں دیکھا کہ مجزز (قیافہ شناس) نے ابھی ابھی زید بن حارثہ اور اسامہ بن زید رضی اللہ عنہما کو دیکھا تو کہا: یہ پاؤں ایک دوسرے سے تعلق رکھتے ہیں۔“ [صحيح البخاري/كتاب المناقب/حدیث: 6770]

حضرت عائشہ رضی اللہ عنہا ہی سے روایت ہے، انہوں نے کہا: ایک دن رسول اللہ صلی اللہ علیہ وسلم میرے ہاں بہت خوش خوش تشریف لائے اور فرمایا: ”اے عائشہ! تم نے نہیں دیکھا کہ مجزز مدلجی آیا اور اس نے اسامہ رضی اللہ عنہ اور زید رضی اللہ عنہ کو دیکھا جبکہ ان دونوں کے جسم پر ایک چادر تھی، جس نے دونوں کے سروں کو چھپا رکھا تھا، ان کے صرف پاؤں کھلے تھے تو اس نے کہا: یہ پاؤں ایک دوسرے سے تعلق رکھتے ہیں۔“ [صحيح البخاري/كتاب المناقب/حدیث: 6771]