صفوان بن محرز سے روایت ہے کہ حضرت عبداللہ بن عمر رضی اللہ عنہما ایک مرتبہ طواف کر رہے تھے کہ اچانک ایک آدمی سامنے آیا اور ان سے پوچھا: ”اے ابن عمر! آپ نے سرگوشی کے متعلق نبی صلی اللہ علیہ وسلم سے کچھ سنا ہے؟“ انہوں نے کہا: میں نے نبی صلی اللہ علیہ وسلم سے سنا، آپ صلی اللہ علیہ وسلم فرما رہے تھے: ”مومن کو اپنے پروردگار کے قریب لایا جائے گا۔“ راویِ حدیث حضرت ہشام نے کہا: ”مومن قریب ہو گا، یہاں تک کہ پروردگار اس پر اپنا بازو رکھ لے گا، پھر اس سے اس کے گناہوں کا اقرار و اعتراف کرائے گا (اور فرمائے گا:) فلاں گناہ تجھے معلوم ہے؟ مومن کہے گا: اے میرے رب! مجھے معلوم ہے۔ دوبارہ یہی سوال جواب ہو گا۔ پھر اللہ تعالیٰ فرمائے گا: میں نے دنیا میں تیرا گناہ چھپائے رکھا اور آج تجھے معاف کرتا ہوں۔ پھر اس کی نیکیوں کا دفتر لپیٹ دیا جائے گا (اس کو دے دیا جائے گا۔) رہے دوسرے لوگ یا کفار! تو ان کے متعلق بھرے مجمع میں اعلان کر دیا جائے: ﴿هَؤُلَاءِ الَّذِينَ كَذَبُوا عَلَى رَبِّهِمْ﴾ [سورة هود: 18] ”یہی لوگ ہیں جنہوں نے اپنے رب پر جھوٹ باندھا تھا۔““ شیبان نے اس حدیث کو قتادہ سے نقل کیا ہے، انہوں نے صفوان سے بیان کیا ہے۔ [صحيح البخاري/كتاب تفسير القرآن/حدیث: 4685]

حضرت صفوان بن محرز مازنی سے روایت ہے، انہوں نے کہا: میں ایک بار حضرت عبداللہ بن عمر رضی اللہ عنہما کا ہاتھ تھامے ان کے ساتھ جا رہا تھا، اچانک ایک شخص سامنے سے آکر کہنے لگا: آپ نے «النَّجْوَىٰ» یعنی (قیامت کے روز اللہ تعالیٰ کی بندے سے) سرگوشی کے متعلق رسول اللہ صلی اللہ علیہ وسلم سے کس طرح سنا ہے؟ حضرت عبداللہ بن عمر رضی اللہ عنہما نے کہا: میں نے رسول اللہ صلی اللہ علیہ وسلم کو یہ فرماتے سنا ہے: ”اللہ تعالیٰ مومن کو اپنے قریب بلا لے گا اور اس پر اپنا پردہِ عزت ڈال کر اسے چھپا لے گا، پھر فرمائے گا: تجھے اپنا فلاں گناہ معلوم ہے؟ تجھے اپنا فلاں گناہ یاد ہے؟ تو وہ کہے گا: جی ہاں، اے رب! مجھے معلوم ہے، حتیٰ کہ اس سے تمام گناہوں کا اقرار کرا لے گا، اور وہ شخص اپنے دل میں خیال کرے گا کہ وہ اب تباہ ہو چکا، اس وقت اللہ تعالیٰ فرمائے گا: میں نے تجھ پر دنیا میں پردہ ڈالا، آج تیرے لیے ان گناہوں کو معاف کرتا ہوں، پھر نیکیوں کا ریکارڈ اس کے ہاتھ میں دے دیا جائے گا، لیکن کافر اور منافق کے متعلق برملا گواہ بولیں گے: ﴿هَؤُلَاءِ الَّذِينَ كَذَبُوا عَلَى رَبِّهِمْ أَلَا لَعْنَةُ اللَّهِ عَلَى الظَّالِمِينَ﴾ [سورة هود: 18] ”یہ وہ لوگ ہیں جنہوں نے اپنے رب پر جھوٹ باندھا، سن لو! ظلم پیشہ لوگوں پر اللہ کی لعنت ہے“۔“ [صحيح البخاري/كتاب تفسير القرآن/حدیث: 2441]

حضرت صفوان بن محرز رحمہ اللہ سے روایت ہے کہ ایک آدمی نے حضرت ابن عمر رضی اللہ عنہ سے پوچھا: ”آپ نے رسول اللہ صلی اللہ علیہ وسلم کو سرگوشی کے متعلق کیا فرماتے سنا ہے؟“ انہوں نے کہا کہ آپ صلی اللہ علیہ وسلم نے فرمایا تھا: ”تم میں سے ایک شخص اللہ تعالیٰ کے قریب ہوگا، اللہ تعالیٰ اپنا بازو اس پر رکھ کر فرمائے گا: ”کیا تو نے فلاں فلاں برے کام کیے تھے؟“ وہ عرض کرے گا: ”جی ہاں، اے اللہ تعالیٰ!“ پھر اللہ تعالیٰ فرمائے گا: ”کیا تو نے یہ برے کام کیے تھے؟“ وہ عرض کرے گا: ”جی ہاں۔“ اللہ تعالیٰ اس سے اقرار کرانے کے بعد فرمائے گا: ”میں نے دنیا میں تیرے گناہوں پر پردہ ڈالے رکھا اور آج میں تیرے وہ گناہ معاف کرتا ہوں۔“” [صحيح البخاري/كتاب تفسير القرآن/حدیث: 6070]

صفوان بن محرز سے روایت ہے کہ حضرت عبداللہ بن عمر رضی اللہ عنہ سے ایک آدمی نے سرگوشی کے متعلق سوال کیا: ”آپ نے رسول اللہ صلی اللہ علیہ وسلم سے کیسے سنا ہے؟“ انہوں نے کہا کہ آپ صلی اللہ علیہ وسلم نے فرمایا: ”تم میں سے کوئی شخص اپنے رب کے قریب ہو گا یہاں تک کہ اللہ تعالیٰ اس پر اپنا پردہ ڈال کر فرمائے گا: ”تو نے فلاں فلاں عمل کیا تھا؟“ وہ کہے گا: ”جی ہاں۔“ اللہ تعالیٰ فرمائے گا: ”تو نے یہ یہ عمل بھی کیا تھا؟“ بندہ ہاں میں جواب دے کر ان کا اقرار کرے گا، پھر اللہ تعالیٰ فرمائے گا: ”میں نے دنیا میں تجھ پر پردہ ڈالا تھا اور آج بھی تجھے معاف کرتا ہوں۔““ ایک دوسری روایت میں ہے، حضرت ابن عمر رضی اللہ عنہ نے کہا: ”میں نے نبی صلی اللہ علیہ وسلم کو یہ فرماتے ہوئے سنا ہے۔“ [صحيح البخاري/كتاب تفسير القرآن/حدیث: 7514]