حضرت عبداللہ بن قیس (ابو موسیٰ اشعری) رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”دو باغ چاندی کے ہیں، ان دونوں کے برتن اور ان کا دیگر ساز و سامان چاندی کا ہو گا اور دوسرے دو باغ سونے کے ہیں، ان کے برتن اور دیگر ساز و سامان بھی سونے کا ہو گا اور جنتِ عدن میں اہل جنت اور ان کے رب کے دیدار میں کوئی چیز حائل نہیں ہو گی، ہاں! رب کبریاء کے چہرے پر کبریائی کی چادر ضرور ہو گی۔“ [صحيح البخاري/كتاب تفسير القرآن/حدیث: 4878]

”اس میں دو باغ ہیں: ان کے برتن اور ان کے علاوہ جو کچھ ان میں ہے سب چاندی کا ہے، ان کے علاوہ اور دو باغ ہیں: ان دونوں کے برتن اور ان کے علاوہ جو کچھ ان میں ہوگا وہ سب سونے کا ہے، وہاں سدا بہار جنت میں اہل جنت اور ان کے رب کے دیدار کے درمیان صرف کبریائی کی چادر ہے جو اس کے چہرے پر ہے۔“ [صحيح البخاري/كتاب تفسير القرآن/حدیث: 4880]

حضرت عبداللہ بن قیس رضی اللہ عنہ سے روایت ہے، وہ نبی صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”دو جنتیں ایسی ہوں گی جن کے برتن اور ان کا تمام ساز و سامان سونے کا ہو گا، اور جنت عدن میں اہل جنت اور اللہ کے دیدار کے درمیان صرف کبریائی کی چادر حائل ہو گی جو ذات باری تعالیٰ کے چہرے پر ہو گی۔“ [صحيح البخاري/كتاب تفسير القرآن/حدیث: 7444]