حضرت عبداللہ بن مسعود رضی اللہ عنہ سے روایت ہے، انہوں نے کہا: ”ہم نبی صلی اللہ علیہ وسلم کے ہمراہ ایک غار میں تھے۔ اس دوران میں آپ پر سورہ ﴿وَالْمُرْسَلَاتِ﴾ [سورة المرسلات: 1] نازل ہوئی۔ آپ اس کی تلاوت کرتے جاتے تھے اور میں آپ کے منہ سے اس کو سنتا اور اسے یاد کرتا جاتا تھا۔ ابھی آپ کا دہن مبارک اس کی تلاوت سے شاداب ہی تھا کہ اچانک ایک سانپ نکل آیا۔ نبی صلی اللہ علیہ وسلم نے ہمیں اس کے قتل کرنے کا حکم دیا۔ ہم اس کی طرف جھپٹے لیکن وہ نکل بھاگا۔ پھر نبی صلی اللہ علیہ وسلم نے فرمایا: ”جس طرح تم اس کے شر سے محفوظ رہے وہ بھی تمہارے شر سے بچ گیا۔““ (راویِ حدیث) عمر بن حفص نے کہا: ”میں نے اپنے باپ سے یہ حدیث بایں الفاظ یاد کی تھی: ”وہ غار، منیٰ میں تھا۔““ [صحيح البخاري/كتاب تفسير القرآن/حدیث: 4934]

حضرت عبداللہ بن مسعود رضی اللہ عنہ سے روایت ہے، انہوں نے فرمایا کہ ہم نبی صلی اللہ علیہ وسلم کے ہمراہ منیٰ کے ایک غار میں تھے، اتنے میں سورہ مرسلات آپ صلی اللہ علیہ وسلم پر نازل ہوئی جس کی آپ صلی اللہ علیہ وسلم تلاوت فرمانے لگے اور میں بھی آپ صلی اللہ علیہ وسلم سے سن کر اسے یاد کرنے لگا، آپ صلی اللہ علیہ وسلم کا روئے مبارک تلاوت سے ابھی تروتازہ تھا کہ اچانک ایک سانپ ہم لوگوں پر کود نکلا، نبی صلی اللہ علیہ وسلم نے فرمایا: ”اسے مار ڈالو“ چنانچہ ہم اسے مارنے کے لیے جلدی دوڑے مگر وہ بچ نکلنے میں کامیاب ہو گیا، تب نبی صلی اللہ علیہ وسلم نے فرمایا: ”جس طرح تم اس کے ضرر سے بچا لیے گئے ہو اسی طرح وہ بھی تمہارے ضرر سے بچا لیا گیا ہے۔“ [صحيح البخاري/كتاب تفسير القرآن/حدیث: 1830]

سیدنا عبداللہ بن مسعود رضی اللہ عنہ سے روایت ہے، انہوں نے کہا کہ ہم رسول اللہ صلی اللہ علیہ وسلم کے ہمراہ ایک غار میں ٹھہرے ہوئے تھے کہ یہ سورت نازل ہوئی: ﴿وَالْمُرْسَلَاتِ عُرْفًا﴾ [سورة المرسلات: 1] ، ابھی ہم آپ صلی اللہ علیہ وسلم کی زبانِ مبارک سے اسے سن ہی رہے تھے کہ کیا دیکھتے ہیں کہ غار کے سوراخ سے ایک سانپ نکلا، ہم اسے مارنے کے لیے اس کے پیچھے بھاگے مگر وہ ہم سے آگے بڑھ گیا اور اپنے بل میں داخل ہو گیا، رسول اللہ صلی اللہ علیہ وسلم نے فرمایا: ”وہ تمہاری اذیت سے بچ گیا جس طرح تم اس کی ایذاء رسانی سے محفوظ رہے۔“ اسرائیل نے اعمش سے، انہوں نے ابراہیم سے، انہوں نے علقمہ سے، انہوں نے سیدنا عبداللہ بن مسعود رضی اللہ عنہ سے اسی طرح روایت کیا اور کہا کہ ہم رسول اللہ صلی اللہ علیہ وسلم کی زبانِ اطہر سے اس سورت کو تازہ بہ تازہ سن رہے تھے، ابوعوانہ نے مغیرہ کے طریق سے اسرائیل کی متابعت کی ہے، نیز حفص، ابو معاویہ اور سلیمان بن قرم نے اعمش سے، انہوں نے ابراہیم سے، انہوں نے اسود سے اور انہوں نے سیدنا عبداللہ بن مسعود رضی اللہ عنہ سے روایت کیا ہے۔ [صحيح البخاري/كتاب تفسير القرآن/حدیث: 3317]

حضرت عبداللہ بن مسعود رضی اللہ عنہ سے روایت ہے، انہوں نے کہا: ”ہم نبی صلی اللہ علیہ وسلم کے ہمراہ تھے تو آپ پر سورہ ﴿وَالْمُرْسَلَاتِ﴾ [سورة المرسلات: 1] نازل ہوئی اور ہم اسے آپ کے منہ سے سیکھ رہے تھے۔ اتنے میں ایک سانپ نکل آیا، ہم لوگ اس کی طرف دوڑے لیکن وہ ہم سے بچ کر نکل دوڑا اور اپنے بل میں گھس گیا۔ رسول اللہ صلی اللہ علیہ وسلم نے فرمایا: ”وہ تمہارے شر سے بچ گیا اور تم اس کے شر سے محفوظ رہے۔““ [صحيح البخاري/كتاب تفسير القرآن/حدیث: 4930]

حضرت عبداللہ بن مسعود رضی اللہ عنہ ہی سے ایک دوسری سند سے روایت ہے، انہوں نے کہا: ”ہم رسول اللہ صلی اللہ علیہ وسلم کے ہمراہ ایک غار میں تھے کہ آپ پر سورہ ﴿وَالْمُرْسَلَاتِ﴾ [سورة المرسلات: 1] نازل ہوئی۔ ہم نے اس کو آپ کے مبارک دہن سے یاد کر لیا۔ ابھی اس کی قراءت سے آپ کے منہ کی تازگی ختم نہیں ہوئی تھی کہ ایک سانپ نکل آیا۔ رسول اللہ صلی اللہ علیہ وسلم نے فرمایا: ”اسے زندہ نہ چھوڑو۔“ ہم اسے مارنے کے لیے اس کی طرف دوڑے لیکن وہ ہم سے بچ نکلا تو آپ صلی اللہ علیہ وسلم نے فرمایا: ”وہ تمہارے شر سے بچ گیا جس طرح تم اس کے شر سے محفوظ رہے۔““ [صحيح البخاري/كتاب تفسير القرآن/حدیث: 4931]