حضرت زر بن حبیش رحمہ اللہ سے روایت ہے، انہوں نے کہا: ”میں نے حضرت ابی بن کعب رضی اللہ عنہ سے پوچھا: اے ابومنذر! آپ کے بھائی حضرت ابن مسعود رضی اللہ عنہ تو معوذتین کے متعلق یوں یوں کہتے ہیں۔“ حضرت ابی بن کعب رضی اللہ عنہ نے جواب دیا کہ ”میں نے رسول اللہ صلی اللہ علیہ وسلم سے اس کے متعلق پوچھا تھا تو آپ صلی اللہ علیہ وسلم نے مجھ سے فرمایا: ”مجھے کہا گیا: ایسا کہہ تو میں نے کہہ دیا۔““ حضرت ابی بن کعب رضی اللہ عنہ نے کہا: ”ہم بھی وہی کہتے ہیں جو رسول اللہ صلی اللہ علیہ وسلم نے فرمایا تھا۔“ [صحيح البخاري/كتاب تفسير القرآن/حدیث: 4977]

حضرت زر بن حبیش رضی اللہ عنہ سے روایت ہے، انہوں نے کہا: ”میں نے ابی بن کعب رضی اللہ عنہ سے معوذتین کے بارے میں پوچھا تو انہوں نے بیان کیا کہ میں نے نبی صلی اللہ علیہ وسلم سے پوچھا تھا تو آپ صلی اللہ علیہ وسلم نے فرمایا: ”مجھے کہا گیا تو میں نے اس طرح کہہ دیا۔“ چنانچہ ہم بھی اسی طرح کہتے ہیں جس طرح رسول اللہ صلی اللہ علیہ وسلم نے کہا۔“ [صحيح البخاري/كتاب تفسير القرآن/حدیث: 4976]