حضرت عائشہ رضی اللہ عنہا سے روایت ہے کہ جب احد کے دن مشرکین شکست کھا گئے تو ابلیس بلند آواز سے چلایا: ”اللہ کے بندو! پچھلے لوگوں کی طرف سے اپنا بچاؤ کرو۔“ چنانچہ آگے والے، پیچھے والوں کی طرف پلٹے، پھر ابلیس نے پکارا: ”آگے والے، پیچھے لوگوں کی طرف سے اپنا بچاؤ کرو۔“ چنانچہ آگے والے پیچھے والوں کی طرف پلٹے پھر آگے والے پیچھے والوں سے بھڑ گئے، اس دوران میں حضرت حذیفہ رضی اللہ عنہ نے اچانک اپنے والد کو دیکھا تو انہوں نے کہا: ”اللہ کے بندو! یہ تو میرے والد ہیں، یہ تو میرے باپ ہیں۔“ (حضرت عائشہ رضی اللہ عنہا نے) فرمایا: ”اللہ کی قسم! مسلمانوں نے انہیں قتل کر کے ہی دم لیا۔“ اس پر حضرت حذیفہ رضی اللہ عنہ نے کہا: «يَغْفِرُ اللَّهُ لَكُمْ» ”اللہ تعالیٰ تمہاری مغفرت کرے۔“ حضرت عروہ رحمہ اللہ نے کہا: ”آخر وقت تک حضرت حذیفہ رضی اللہ عنہ کے یہی جذبات رہے، یعنی مسلمانوں سے محبت میں کمی نہ آئی۔“ [صحيح البخاري/كتاب الديات/حدیث: 6890]

حضرت عائشہ رضی اللہ عنہا سے روایت ہے، انہوں نے فرمایا: جب غزوہ احد میں مشرکین شکست خوردہ ہوئے تو ابلیس نے چلا کر کہا: اللہ کے بندو! اپنے پیچھے والوں کی خبر لو۔ چنانچہ آگے والے پچھلوں پر ٹوٹ پڑے اور آپس میں الجھ گئے۔ اس دوران میں حضرت حذیفہ رضی اللہ عنہ نے دیکھا کہ ان کے والد حضرت یمان رضی اللہ عنہ بھی پیچھے تھے۔ انہوں نے کہا: اللہ کے بندو! یہ میرے والد ہیں، یہ میرے والد ہیں، لیکن اللہ کی قسم! مسلمان نہ رکے حتیٰ کہ انہوں نے ان کو قتل کر دیا۔ حضرت حذیفہ رضی اللہ عنہ نے صرف اتنا کہا: «يَغْفِرُ اللَّهُ لَكُمْ» ”اللہ تمہیں معاف کرے“ (یہ تم نے کیا کیا ہے؟) عروہ رحمہ اللہ فرماتے ہیں: پھر حضرت حذیفہ رضی اللہ عنہ ہمیشہ (آخری دم تک اپنے والد کے قاتلوں کے لیے) دعائے خیر کرتے رہے یہاں تک کہ اللہ تعالیٰ سے جا ملے۔ [صحيح البخاري/كتاب الديات/حدیث: 3290]