سیدنا ثعلبہ بن ابی مالک رضی اللہ عنہ سے روایت ہے کہ انہوں نے اپنے بڑوں سے سنا تھا، وہ بیان کرتے تھے کہ بنو قریظہ میں ایک قریشی کا زمین کا ایک قطعہ تھا۔ وادی مہزور میں ان لوگوں کا پانی کے سلسلے میں تنازع ہو گیا جسے وہ آپس میں تقسیم کیا کرتے تھے۔ وہ یہ مقدمہ رسول اللہ صلی اللہ علیہ وسلم کی خدمت میں لے آئے۔ تو آپ صلی اللہ علیہ وسلم نے ان میں فیصلہ فرمایا کہ ”جب پانی ٹخنے ٹخنے ہو جائے تو پھر اوپر والا اسے نیچے والے کی طرف جانے سے مت روکے۔“ [سنن ابي داود/كتاب الأقضية /حدیث: 3638]

سیدنا عبداللہ بن زبیر رضی اللہ عنہ سے روایت ہے کہ ایک آدمی نے پتھریلی زمین میں سے آنے والے پانی کے ایک نالے کے سلسلے میں سیدنا زبیر رضی اللہ عنہ سے جھگڑا کیا جس سے یہ اپنے کھیتوں کو سیراب کرتے تھے۔ انصاری نے سیدنا زبیر رضی اللہ عنہ سے کہا: ”پانی کو چھوڑیں اور آگے آنے دیں۔“ سیدنا زبیر رضی اللہ عنہ نے انکار کیا۔ (چاہا کہ پہلے وہ خود سیراب کر لیں) تو نبی کریم صلی اللہ علیہ وسلم نے سیدنا زبیر رضی اللہ عنہ سے فرمایا: ”زبیر! پہلے تم پانی لے لو پھر اپنے ہمسائے کی طرف چھوڑ دیا کرو۔“ اس پر انصاری ناراض ہو گیا اور کہا: ”اے اللہ کے رسول! چونکہ یہ آپ کا پھوپھی زاد ہے (اس لیے آپ نے یہ فیصلہ کیا ہے۔)“ تو رسول اللہ صلی اللہ علیہ وسلم کا چہرہ بدل گیا۔ پھر آپ صلی اللہ علیہ وسلم نے فرمایا: ”زبیر! کھیت کو پانی دے، پھر اسے روک لے حتیٰ کہ کھیت کی منڈیر تک چڑھ جائے۔“ سیدنا زبیر رضی اللہ عنہ نے کہا: اللہ کی قسم! میں سمجھتا ہوں کہ یہ آیت کریمہ اس سلسلے میں نازل ہوئی تھی ﴿فَلَا وَرَبِّكَ لَا يُؤْمِنُونَ حَتَّىٰ يُحَكِّمُوكَ﴾ [سورة النساء: 65] ”قسم تیرے رب کی! یہ لوگ اس وقت تک مومن نہیں ہو سکتے جب تک کہ یہ اپنے تمام تنازعات میں آپ کو اپنا قاضی اور فیصل نہ مان لیں، پھر جو فیصلہ آپ کر دیں اس کے بارے میں ان کے دلوں میں کوئی تنگی بھی نہ آئے اور خوب خوشی سے تسلیم کر لیں۔“ [سنن ابي داود/كتاب الأقضية /حدیث: 3637]

جناب عمرو بن شعیب اپنے والد سے، وہ (شعیب) اپنے دادا رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے وادی مہزور میں نالے کے پانی کے سلسلے میں فیصلہ فرمایا تھا کہ ”پانی روک لیا جائے حتیٰ کہ ٹخنے ٹخنے تک آ جائے، پھر اوپر والا نیچے والے کی جانب چھوڑ دے۔“ [سنن ابي داود/كتاب الأقضية /حدیث: 3639]