سیدنا انس بن مالک رضی اللہ عنہ سے روایت ہے کہ نبی کریم صلی اللہ علیہ وسلم کے پاس ایک آدمی بیٹھا ہوا تھا کہ ایک شخص اس کے پاس سے گزرا، تو اس نے کہا: ”اے اللہ کے رسول! بیشک مجھے اس سے محبت ہے۔“ نبی کریم صلی اللہ علیہ وسلم نے اس سے فرمایا: ”کیا تو نے اس کو بتایا ہے؟“ اس نے کہا: ”نہیں۔“ آپ صلی اللہ علیہ وسلم نے فرمایا: ”اس کو بتا دے۔“ چنانچہ وہ اس سے جا کر ملا اور اس سے بولا: ”مجھے تم سے اللہ کے لیے محبت ہے۔“ تو اس نے جواب دیا: ”اللہ بھی تم سے محبت کرے جس کی خاطر تم مجھ سے محبت کرتے ہو۔“ [سنن ابي داود/أبواب النوم /حدیث: 5125]

جناب حبیب بن عبید، سیدنا مقدام بن معدیکرب رضی اللہ عنہ سے روایت کرتے ہیں اور جناب حبیب کو سیدنا مقدام سے ملاقات حاصل تھی، وہ نبی کریم صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”جب آدمی کو اپنے کسی بھائی سے محبت ہو، تو چاہیے کہ اسے بتا دے کہ وہ اس سے محبت کرتا ہے۔“ [سنن ابي داود/أبواب النوم /حدیث: 5124]