حضرت جابر (بن عبداللہ) رضی اللہ عنہ سے منقول ہے کہ میرے والد محترم رضی اللہ عنہ احد کے دن شہید ہوئے۔ میں ان کے چہرے سے کپڑا ہٹاتا تھا اور روتا تھا، لوگ مجھے روکتے تھے جبکہ رسول اللہ صلی اللہ علیہ وسلم مجھے نہیں روکتے تھے۔ میری پھوپھی محترمہ (آواز سے) رونے لگی تو رسول اللہ صلی اللہ علیہ وسلم نے فرمایا: ”اس پر نہ رو۔ تمھارے اٹھانے تک فرشتوں نے برابر اس کو اپنے پروں کے ساتھ سایہ کیے رکھا۔“ (رضی اللہ عنہ وارضاہ) [سنن نسائي/كتاب الجنائز/حدیث: 1846]

حضرت جابر رضی اللہ عنہ بیان کرتے ہیں کہ جنگِ احد کے دن میرے باپ کی میت اس حال میں لائی گئی کہ ان کا چہرہ بگاڑ دیا گیا تھا (کافروں نے ان کے چہرے کے اعضا کاٹ ڈالے تھے) تو ان کی میت رسول اللہ صلی اللہ علیہ وسلم کے سامنے رکھ دی گئی اور اسے ایک کپڑے سے ڈھانپ دیا گیا۔ میں ان کے چہرے سے کپڑا ہٹانے کی کوشش کرتا تھا تو میری قوم کے لوگ مجھے روکتے تھے۔ آخر نبی صلی اللہ علیہ وسلم نے میت اٹھانے کا حکم دیا۔ جب میت اٹھائی گئی تو آپ صلی اللہ علیہ وسلم نے ایک عورت کے رونے کی آواز سنی تو فرمایا: ”یہ کون ہے؟“ لوگوں نے کہا: یہ عمرو کی بیٹی یا عمرو کی بہن ہے۔ آپ صلی اللہ علیہ وسلم نے فرمایا: ”نہ روؤ“ یا فرمایا: ”کیوں روتی ہو؟ میت کے اٹھائے جانے تک فرشتوں نے اسے اپنے مبارک پروں سے سایہ کیے رکھا۔“ [سنن نسائي/كتاب الجنائز/حدیث: 1843]