حضرت حجاج بن عمرو رضی اللہ عنہ بیان کرتے ہیں کہ نبی صلی اللہ علیہ وسلم نے فرمایا: ”جس شخص کی ٹانگ وغیرہ ٹوٹ جائے یا وہ لنگڑا ہو جائے (حتیٰ کہ وہ بیت اللہ تک نہیں پہنچ سکتا) تو وہ حلال ہو گیا اور اس پر آئندہ حج ہوگا۔“ (عکرمہ رحمہ اللہ نے کہا:) میں نے حضرت ابن عباس رضی اللہ عنہما اور حضرت ابوہریرہ رضی اللہ عنہ سے پوچھا تو انہوں نے فرمایا کہ حضرت حجاج انصاری رضی اللہ عنہ نے سچ کہا۔ (استاذ) شعیب نے اپنی حدیث میں کہا: اس پر آئندہ سال حج ہوگا۔ [سنن نسائي/كتاب مناسك الحج/حدیث: 2864]

حضرت حجاج بن عمرو انصاری رضی اللہ عنہ سے روایت ہے کہ انہوں نے رسول اللہ صلی اللہ علیہ وسلم کو فرماتے سنا: ”جو شخص (دورانِ احرام میں بیت اللہ تک پہنچنے سے پہلے) لنگڑا ہو جائے یا اس کی ٹانگ وغیرہ ٹوٹ جائے (اور اس کا بیت اللہ تک پہنچنا ممکن نہ رہے) تو وہ حلال ہو گیا اور اس پر دوبارہ حج ہوگا۔“ (راوی نے کہا:) میں نے اس بارے میں حضرت ابن عباس اور حضرت ابوہریرہ رضی اللہ عنہما سے پوچھا تو انہوں نے فرمایا کہ حضرت حجاج انصاری رضی اللہ عنہ نے سچ بیان فرمایا۔ [سنن نسائي/كتاب مناسك الحج/حدیث: 2863]