عبداللہ بن دینار رحمہ اللہ سے روایت ہے کہ حضرت عبداللہ بن عمر رضی اللہ عنہما (اکثر) جناب ابو طالب کا شعر پڑھا کرتے تھے: ”وہ گورے مکھڑے والا جس کے رخِ زیبا کے واسطے سے ابرِ رحمت کی دعائیں مانگی جاتی ہیں، وہ یتیموں کا سہارا، بیواؤں اور مسکینوں کا سرپرست ہے۔“ [صحيح البخاري/كتاب الاستسقاء/حدیث: 1008]

حضرت عبداللہ بن عمر رضی اللہ عنہما سے روایت ہے، انہوں نے فرمایا کہ جب میں نبی صلی اللہ علیہ وسلم کے چہرہ انور کو دعائے استسقاء کرتے وقت دیکھتا ہوں تو اکثر مجھے شاعر (ابوطالب) کا شعر یاد آجاتا ہے، آپ صلی اللہ علیہ وسلم منبر سے نہ اتر پاتے تھے کہ تمام پرنالے تیزی سے بہنے لگتے، وہ شعر یہ ہے: «وَأَبْيَضَ يُسْتَسْقَى الْغَمَامُ بِوَجْهِهِ ثِمَالَ الْيَتَامَى عِصْمَةً لِلْأَرَامِلِ» ”وہ گورے مکھڑے والا جس کے رخِ زیبا کے واسطے سے ابرِ رحمت کی دعائیں مانگی جاتی ہیں، وہ یتیموں کا سہارا، بیواؤں اور مسکینوں کا سرپرست ہے۔“ [صحيح البخاري/كتاب الاستسقاء/حدیث: 1009]