حضرت یعلیٰ بن امیہ رضی اللہ عنہ سے روایت ہے، انہوں نے کہا کہ میں نے نبی کریم صلی اللہ علیہ وسلم کے ہمراہ جیشِ عسرہ (غزوہ تبوک) میں شرکت کی۔ میرے نزدیک سب سے زیادہ جن اعمال پر مجھے اعتماد ہے ان میں سے ایک یہ ہے۔ (کہتے ہیں کہ) میرے ساتھ میرا ایک مزدور بھی تھا۔ وہ ایک شخص سے لڑ پڑا تو ان میں سے ایک نے دوسرے کی انگلی کاٹ کھائی۔ اس نے اپنی انگلی کھینچی تو سامنے والے کا ثنیہ دانت بھی گرا دیا۔ وہ نبی کریم صلی اللہ علیہ وسلم کے پاس مقدمہ لے کر گیا تو آپ صلی اللہ علیہ وسلم نے اسے لغو قرار دیا اور فرمایا: ”کیا وہ اپنی انگلی تیرے منہ میں چھوڑ دیتا کہ تو اسے چبا جاتا؟“ حضرت یعلیٰ رضی اللہ عنہ نے کہا: میرے گمان کے مطابق آپ صلی اللہ علیہ وسلم نے فرمایا: ”جیسے اونٹ چبا جاتا ہے۔“ [صحيح البخاري/كتاب الإجارة/حدیث: 2265]

حضرت یعلی بن امیہ رضی اللہ عنہ سے روایت ہے، انہوں نے کہا کہ میں رسول اللہ صلی اللہ علیہ وسلم کے ہمراہ تھا تو آپ کے پاس ایک آدمی آیا جس نے جبہ پہن رکھا تھا اور اس پر خوشبو وغیرہ کے نشانات تھے۔ حضرت عمر رضی اللہ عنہ نے مجھے فرمایا: کیا تو اس بات کو پسند کرتا ہے کہ آپ صلی اللہ علیہ وسلم کو اس حالت میں دیکھے جب آپ پر وحی نازل ہو رہی ہو؟ اس دوران رسول اللہ صلی اللہ علیہ وسلم پر وحی نازل ہوئی۔ جب آپ سے نزولِ وحی کی کیفیت ختم ہوئی تو آپ صلی اللہ علیہ وسلم نے فرمایا: ”عمرے میں وہی کچھ کرو جو حج میں کرتے ہو۔“ [صحيح البخاري/كتاب الإجارة/حدیث: 1847]