ذاتی معلومات و نسب:
امام ابن الجارود رحمہ اللہ کا مکمل نام ابومحمد عبد اللہ بن علی بن جارود نیشاپوری ہے۔

اساتذہ کرام:
آپ رحمہ اللہ کے اساتذہ میں ابوسعید اشج، حسن بن محمد زعفرانی، علی بن خشرم، محمود بن آدم، اسحاق کوسج، زیاد بن ایوب، یعقوب دورقی، عبد اللہ بن ہاشم طوسی، احمد بن ازہر، احمد بن یوسف، محمد بن ابو عبد الرحمن مقری، محمد بن یحییٰ ذہلی، عبدالرحمن بن بشر بن حکم، محمد بن عبد اللہ بن عبد الحکم، بحر بن نصر خولانی اور محمد بن عثمان بن کرامت وغیرہ شامل ہیں۔

تلامذہ:
امام ابن الجارود رحمہ اللہ کے تلامذہ کی فہرست میں ابوحامد بن شرقی، محمد بن نافع خزاعی مکی، دعلج بن احمد سجزی، ابوالقاسم طبرانی، محمد بن جبریل جی اور یحییٰ بن منصور قاضی وغیرہ کے نام نمایاں ہیں۔

اہم تصانیف:
امام ابن الجارود رحمہ اللہ نے کئی علمی شہ پارے یادگار چھوڑے ہیں جن میں سے درج ذیل کتب مطبوعہ ہیں:
➊ «الْمُنْتَقَى مِنَ السُّنَنِ الْمُسْنَدَةِ عَنْ رَّسُولِ اللهِ صَلَّى اللهُ عَلَيْهِ وَسَلَّمَ فِي الْأَحْكَامِ»
➋ «اَلضُّعَفَاءُ وَالْمَشْرُوكُونَ»
➌ «تَارِيخُ ابْنِ الْجَارُودِ»
➍ «اَلْكُنى»
➎ «الصَّحَابَةُ»
➏ «مَشِيخَةُ ابْنِ الْجَارُودِ»

توثیق و توصیف:
حافظ ذہبی رحمہ اللہ آپ کے بارے میں یوں رطب اللسان ہیں:
«كَانَ مِنْ أَئِمَّةِ الْأَثَرِ ----- أَثْنَى عَلَيْهِ الحَاكِمُ وَالنَّاسُ.»
”آپ رحمہ اللہ کا شمار ائمہ حدیث میں ہوتا ہے، امام حاکم رحمہ اللہ اور دیگر محدثین نے آپ رحمہ اللہ کی تعریف کی ہے۔“ [سير أعلام النبلاء: 14/240]
حافظ ذہبی رحمہ اللہ مزید لکھتے ہیں:
«أَلْحَافِظُ الْإِمَامُ النَّاقِدُ ---- وَكَانَ مِنَ الْعُلَمَاءِ الْمُتَّقِنِيْنَ الْمُجَوِّدِينَ.»
”آپ رحمہ اللہ حافظ، امام اور ناقد تھے، نیز آپ رحمہ اللہ پختہ کار علمائے کرام میں سے تھے۔“ [تذكرة الحفاظ: 3/12]
حافظ ذہبی رحمہ اللہ نے امام صاحب کا تذکرہ اپنی کتاب «ذِكْرُ مَنْ يُعْتَمَدُ قَوْلُهُ فِي الْجَرْحِ وَالتَّعْدِيلِ» [ص: 204] میں کیا ہے۔
حافظ ابن عبد الہادی رحمہ اللہ (744ھ) فرماتے ہیں:
«هُوَ الْحَافِظُ الْإِمَامُ الْمُسْنِدُ.»
”آپ حافظ، امام اور مسند ہیں۔“ [طبقات علماء الحديث: 2/468]

وفات حسرت آیات:
علم و فضل کا یہ آفتاب 307ھ بمطابق 920ء کو داعیِ اجل کو لبیک کہہ گیا اور دارِ فانی سے کوچ کر گیا۔ «اللَّهُمَّ اغْفِرْ لَهُ، وَارْحَمْهُ.»