حمید بیان کرتے ہیں: ہم لوگ سیدنا انس بن مالک رضی اللہ عنہ کے ساتھ تھے، اُنہوں نے ارشاد فرمایا: اللہ کی قسم! ہم لوگ (یعنی صحابہ کرام) نبی اکرم صلی اللہ علیہ وسلم کے حوالے سے، تم لوگوں کو جو کچھ بھی بیان کریں گے، وہ ہم نے نبی اکرم صلی اللہ علیہ وسلم سے سنا ہو گا، کیونکہ ہم میں سے کوئی ایک کسی دوسرے کے ساتھ بھی جھوٹ نہیں بولتا ہے (یا کسی اور کی طرف کوئی جھوٹی بات منسوب نہیں کرتا ہے، تو وہ نبی اکرم صلی اللہ علیہ وسلم کی طرف کوئی جھوٹی بات کیسے منسوب کر سکتا ہے؟)۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں۔ [مجمع الزاوئد ومنبع الفوائد/كِتَابُ الْعِلْمِ/حدیث: 690]

سیدنا براء رضی اللہ عنہ بیان کرتے ہیں: ہر حدیث ہم نے نبی اکرم صلی اللہ علیہ وسلم کی زبانی نہیں سنی ہوئی ہے، آپ صلی اللہ علیہ وسلم کے اصحاب، آپ صلی اللہ علیہ وسلم کے حوالے سے ہمیں حدیث بیان کر دیا کرتے تھے، کیونکہ ہم اونٹوں کی دیکھ بھال کی وجہ سے مصروف رہتے تھے۔
یہ روایت امام أحمد نے نقل کی ہے اور اس کے رجال صحیح کے رجال ہیں۔ [مجمع الزاوئد ومنبع الفوائد/كِتَابُ الْعِلْمِ/حدیث: 691]