سیدنا ابوبرزه رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”مجھے تم لوگوں کے حوالے سے بھٹکانے والی شہوتوں کا اندیشہ ہے، جن کا تعلق تمہارے پیٹ اور شرم گاہوں سے ہو گا، اور گمراہ کرنے والی نفسانی خواہشات (کا اندیشہ ہے)۔“
یہ روایت امام أحمد اور امام بزار نے نقل کی ہے اور امام طبرانی نے معجم کبیر میں نقل کی ہے اس کے رجال صحیح کے رجال ہیں، البتہ ابوالحکم بنانی کا معاملہ مختلف ہے، جس نے سیدنا ابوبرزہ رضی اللہ عنہ سے روایت نقل کی ہے، اُس کے بارے میں امام طبرانی نے یہ بیان کیا ہے: یہ ابوالحکم سے منقول ہے، اور وہ علی بن حکم ہے، امام بخاری رحمہ اللہ اور سنن کے مؤلفین نے اس کے حوالے سے روایات نقل کی ہیں۔ [مجمع الزاوئد ومنبع الفوائد/كِتَابُ الْعِلْمِ/حدیث: 891]

حضرت غضیف بن حارث ثمالی رضی اللہ عنہ بیان کرتے ہیں: عبدالملک بن مروان نے مجھے پیغام بھیج کر بلوایا، اُس نے کہا: اے ابوسلیمان! ہم نے دو معاملوں کے حوالے سے لوگوں کو جمع کیا ہے، حضرت غضیف رضی اللہ عنہ نے دریافت کیا: وہ دو معاملے کیا ہیں؟ عبدالملک بن مروان نے کہا: جمعہ کے دن منبر پر ہاتھ بلند کرنا، اور صبح و عصر کی نماز کے بعد درس دینا (یا وعظ کرنا)، تو حضرت غضیف بن حارث رضی اللہ عنہ نے کہا: میرے نزدیک یہ دونوں چیزیں تمہاری بدعت کی مانند ہیں، اور میں تمہیں ان دونوں میں سے کسی کی اجازت نہیں دوں گا، عبدالملک بن مروان نے دریافت کیا: وہ کیوں؟ تو حضرت غضیف رضی اللہ عنہ نے جواب دیا: کیونکہ نبی اکرم صلی اللہ علیہ وسلم نے یہ بات ارشاد فرمائی ہے: ” جو بھی قوم بدعت ایجاد کرتی ہے، تو اس (بدعت) کی مانند کوئی سنت اٹھا لی جاتی ہے۔،، (پھر حضرت غضیف رضی اللہ عنہ نے فرمایا:) ”سنت کو مضبوطی سے تھام کے رکھنا، بدعت ایجاد کرنے سے بہتر ہے۔،،
یہ روایت امام احمد اور امام بزار نے نقل کی ہے، اس کی سند میں ایک راوی ابوبکر بن عبداللہ بن ابومریم ہے، اور وہ منکر الحدیث ہے۔ [مجمع الزاوئد ومنبع الفوائد/كِتَابُ الْعِلْمِ/حدیث: 892]

سیدنا غضیف بن حارث ثمالی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب بھی کوئی اُمت اپنے نبی کے بعد اپنے دین میں کوئی بدعت ایجاد کرتی ہے، تو وہ (اُمت) اُس (بدعت) کی مانند کوئی سنت ضائع کر دیتی ہے۔“
یہ روایت امام طبرانی نے معجم کبیر میں نقل کی ہے، اس کی سند میں ایک راوی ابوبکر بن ابومریم ہے اور وہ منکر الحدیث ہے۔ [مجمع الزاوئد ومنبع الفوائد/كِتَابُ الْعِلْمِ/حدیث: 893]

سیدنا عبداللہ بن عباس رضی اللہ عنہما فرماتے ہیں: ”لوگوں پر جو بھی نیا سال آتا ہے، یہ اس میں کوئی بدعت ایجاد کر لیتے ہیں، اور کسی سنت کو ختم کر دیتے ہیں، یہاں تک کہ بدعتیں رہ جائیں گی اور سنتیں ختم ہو جائیں گی۔“
یہ روایت امام طبرانی نے معجم کبیر میں نقل کی ہے اور اس کے رجال کی توثیق کی گئی ہے۔ [مجمع الزاوئد ومنبع الفوائد/كِتَابُ الْعِلْمِ/حدیث: 894]

سیدنا ابوامامہ رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”آسمان کے سائے تلے اللہ تعالیٰ کے علاوہ جتنے بھی معبودوں کی عبادت کی جاتی ہے، اُن میں سے کوئی بھی (باطل معبود) اللہ تعالیٰ کے نزدیک نفسانی خواہش کی پیروی سے زیادہ بڑا (یعنی زیادہ ناپسندیدہ) نہیں ہے۔“
یہ روایت امام طبرانی نے معجم کبیر میں نقل کی ہے، اس کی سند میں ایک راوی حسن بن دینار ہے اور وہ متروک الحدیث ہے۔ [مجمع الزاوئد ومنبع الفوائد/كِتَابُ الْعِلْمِ/حدیث: 895]

سیدنا عمر بن خطاب رضی اللہ عنہ بیان کرتے ہیں: نبی اکرم صلی اللہ علیہ وسلم نے سیدہ عائشہ رضی اللہ عنہا سے فرمایا: ”اے عائشہ! بیشک وہ لوگ جنہوں نے اپنے دین میں فرقہ بندی اختیار کی اور وہ مختلف گروہوں میں تقسیم ہو گئے، وہ بدعت کی پیروی کرنے والے اور نفسانی خواہشات کے پیروکار لوگ تھے، اُن کے لیے توبہ کی گنجائش نہیں ہے، میں ان سے لاتعلق ہوں اور وہ مجھ سے لاتعلق ہیں۔“
یہ روایت امام طبرانی نے معجم صغیر میں نقل کی ہے اس کی سند میں دو راوی، بقیہ اور مجالد بن سعید ہیں اور یہ دونوں ضعیف ہیں۔ [مجمع الزاوئد ومنبع الفوائد/كِتَابُ الْعِلْمِ/حدیث: 896]

سیدنا معاذ بن جبل رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”جو شخص کسی بدعتی کی طرف چل کر جائے، تاکہ اُس کی تعظیم کرے، تو اُس نے اسلام کو منہدم کرنے میں مدد دی۔“
یہ روایت امام طبرانی نے معجم کبیر میں نقل کی ہے، اس کی سند میں ایک راوی بقیہ ہے اور وہ ضعیف ہے۔ [مجمع الزاوئد ومنبع الفوائد/كِتَابُ الْعِلْمِ/حدیث: 897]

سیدنا حکم بن عمیر ثمالی رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”ایسا معاملہ جو پریشان کر دے، ایسا بوجھ جو کمر توڑ دے اور ایسی خرابی جو کبھی منقطع نہ ہو، وہ بدعتوں کا اظہار ہے۔“
یہ روایت امام طبرانی نے معجم کبیر میں نقل کی ہے، اس کی سند میں ایک راوی بقیہ بن ولید ہے اور وہ ضعیف ہے۔ [مجمع الزاوئد ومنبع الفوائد/كِتَابُ الْعِلْمِ/حدیث: 898]