سیدنا زید بن ارقم رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بے شک اللہ تعالیٰ تین مواقع پر خاموشی کو پسند کرتا ہے قرآن کی تلاوت کے وقت، میدان جنگ میں اور جنازے کے وقت“۔
یہ روایت امام طبرانی نے معجم کبیر میں نقل کی ہے۔ اس کی سند میں ایک راوی ایسا ہے، جس کا نام بیان نہیں کیا گیا۔ [مجمع الزاوئد ومنبع الفوائد/كِتَابُ الْجَنَائِزِ/حدیث: 4129]

سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم جب کسی جنازے میں شریک ہوتے تھے تو آپ پر پریشانی کے آثار نمایاں ہوتے تھے، اور آپ زیادہ تر اپنے خیالوں میں گم ہوتے تھے (یعنی دوسروں کے ساتھ بات چیت نہیں کرتے تھے)۔
یہ روایت امام طبرانی نے معجم کبیر میں نقل کی ہے۔ اس کی سند میں ایک راوی ابن لہیعہ ہے، اور اس کے بارے میں کلام کیا گیا ہے۔ (علامہ ہیثمی فرماتے ہیں:) میں یہ کہتا ہوں، اس بارے میں مختلف آثار ”مناقب“ سے متعلق باب میں آئیں گے اور اس باب میں آئیں گے کہ جب میت کو قبر میں داخل کیا جائے تو اس وقت کیا پڑھا جائے۔ [مجمع الزاوئد ومنبع الفوائد/كِتَابُ الْجَنَائِزِ/حدیث: 4130]