سیدنا ابوطلحہ رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا: ”اے قریش کے نوجوانو! تم زنا، نہ کرو، جس شخص کی جوانی سلامت رہے گی، اُسے جنت نصیب ہو گی“۔
یہ روایت امام ابویعلیٰ نے نقل کی ہے اور اس کی سند منقطع ہے اور اس کی سند میں ایسا راوی ہے، جس سے میں واقف نہیں ہوں۔ [مجمع الزاوئد ومنبع الفوائد/كِتَابُ النِّكَاحِ/حدیث: 7315]

سیدنا جابر رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا: ”جو نوجوان کم عمری میں شادی کر لیتا ہے، تو اُس کا شیطان چیخ کر یہ کہتا ہے: ہائے بربادی، ہائے بربادی، اس نے اپنے دین کو مجھ سے محفوظ کر لیا“۔
یہ روایت امام ابویعلیٰ نے اور امام طبرانی نے معجم اوسط میں نقل کی ہے اس کی سند میں ایک راوی خالد بن اسماعیل مخزومی ہے اور وہ متروک ہے۔ [مجمع الزاوئد ومنبع الفوائد/كِتَابُ النِّكَاحِ/حدیث: 7316]

سیدنا عبداللہ بن عمر رضی اللہ عنہما روایت کرتے ہیں: نبی اکرم صلی اللہ علیہ وسلم نے ارشاد فرمایا: ”ہم نے تمہاری دنیا میں سے، صرف خواتین کو حاصل کیا ہے“۔
یہ روایت امام طبرانی نے نقل کی ہے، اس کی سند میں ایک راوی زکریا بن ابراہیم بن عبداللہ بن مطیع ہے، میں نے کسی کو اس کا ذکر کرتے ہوئے نہیں پایا ہے، اس روایت کے بقیہ رجال ثقہ ہیں۔ [مجمع الزاوئد ومنبع الفوائد/كِتَابُ النِّكَاحِ/حدیث: 7317]

سیدنا عبداللہ بن عباس رضی اللہ عنہما روایت کرتے ہیں: نبی اکرم صلی اللہ علیہ وسلم نے ارشاد فرمایا: ”پانچ چیزیں ”مرسلین“ کی سنت ہیں، حیاء، بردباری، پچھنے لگوانا، عطر لگانا اور نکاح کرنا“۔
یہ روایت امام طبرانی نے نقل کی ہے، اس کی سند میں ایک راوی اسماعیل بن شیبہ ہے، امام ذہبی کہتے ہیں: یہ واہی ہے۔ انہوں نے اس کے حوالے سے یہ حدیث، اور ایک اور حدیث نقل کی ہے۔
(علامہ ہیثمی فرماتے ہیں:) میں یہ کہتا ہوں: آگے چل کر یزید خطمی کی نقل کردہ حدیث آئے گی، جو پچھنے لگوانے کے بارے میں ہے۔ [مجمع الزاوئد ومنبع الفوائد/كِتَابُ النِّكَاحِ/حدیث: 7318]