سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم نے ارشاد فرمایا: ”جب میری طرف وحی کی گئی (راوی کو شک ہے، شاید یہ الفاظ ہیں:) جب مجھے نبی بنایا گیا (راوی کو شک ہے، یا اس کی مانند کوئی اور کلمہ ہے) تو ”میں“ جس بھی پتھر، یا درخت کے پاس سے گزرتا تھا، تو وہ مجھے کہتا تھا: یا رسول اللہ! آپ کو سلام ہو۔“
یہ روایت امام بزار نے اپنے استاد عبداللہ بن شبیب کے حوالے سے نقل کی ہے، اور وہ ضعیف ہے۔ [مجمع الزاوئد ومنبع الفوائد/كِتَابُ عَلَامَاتِ النُّبُوَّةِ/حدیث: 13955]

سیدنا علی رضی اللہ عنہ بیان کرتے ہیں: میں نبی اکرم صلی اللہ علیہ وسلم کے ساتھ نکلا، آپ صلی اللہ علیہ وسلم جس بھی درخت، یا پتھر کے پاس سے گزرتے تھے، وہ آپ صلی اللہ علیہ وسلم کو سلام کرتا تھا۔
یہ روایت امام طبرانی نے معجم اوسط میں نقل کی ہے، اس میں تابعی ابوعمارہ ہے، اور میں اس سے واقف نہیں ہوں، اس روایت کے بقیہ رجال ثقہ ہیں۔ [مجمع الزاوئد ومنبع الفوائد/كِتَابُ عَلَامَاتِ النُّبُوَّةِ/حدیث: 13956]